Гражданскай оборуона күнүгэр бэтэрээннэри эҕэрдэлээтилэр

Бэҕэһээ Арассыыйа гражданскай оборуоната төрүттэммит күнүгэр үгүс тэрээһин буолан ааста.

Гражданскай оборуона күнүн бырааһынньыктааҕы тэрээһинигэр Арассыыйа ЫБММ кылаабынай управлениетын начаалынньыга Павел Гарин бэтэрээннэри эҕэрдэлээн туран, биэдэмистибэннэй мэтээллэри туттарда.

Итини таһынан уһулуччу көрдөрүүлээх, өр сылларга бу салааҕа үлэлээбит, Арассыыйа ЫБММ кылаабынай управлениетын үлэһиттэрэ, СӨ нэһилиэнньэҕэ куттал суох буолуутун хааччыйар судаарыстыбаннай кэмитиэтин үлэһиттэрэ наҕараадаланнылар.

91 сыл анараа өттүгэр Сэбиэскэй сойууска Салгынтан саба түһүүнү утары олохтох оборуона (МПВО) тэриллибитэ. Сыл-хонук ааһан 1961 с. ССРС гражданскай оборуоната буола уларыйбыта. Итинтэн ыла нэһилиэнньэҕэ кутал суох буолуутун хааччыйар теоретическай төрүттэр оҥоһуллубуттара, инженернай-тиэхиньиичэскэй, санитарнай-гигиеническай, о.д.а анал тэрээһиннэр ыытыллар буолбуттара.

Бүгүн гражданскай оборуона – бу уустук, элбэх хайысхалаах РФ национальнай куттал суох буолуутун хааччыйар тиһигэр киирэр судаарыстыбаннай салаанан буолар. Тиһик эйэлээх уонна байыаннай кэмҥэ ыксаллаах быһыыга-майгыга территорияҕа уонна нэһилиэнньэҕэ куттал суох буолуутугар киэҥ хабааннаах соругу толорор. Саха сиригэр ыксаллаах быһыыны-майгыны сэрэтэр уонна туоратар биир кэлим судаарыстыбаннай тиһик тэриллэн көдьүүстээхтик үлэлиир диэн иһитиннэрэр СӨ Быыһыыр сулууспатын пресс-сулууспата.