Григорий Попов үс сыл буолан баран Владивостокка панкратион улахан турнирыгар киирсиэҕэ

Биллиилээх спортсмен, ​​UFC экс-байыаһа Григорий Попов үс сыл буолан баран күөн көрсүүгэ тахсыаҕа.

Турнир тэрийээччилэрэ биллэрбиттэринэн Саха сириттэн сылдьар Григорий Попову (14-4) утары Приморскай кыраай спортсмена Артем Бутко  (4-0) тахсыаҕа. Ол эбэтэр муус устар 26 күнүгэр “Фетисов Аренаҕа” MFP, Open FC уонна WKG кытта бииргэ сүҥкэннээх  панкратион турнира ыытыллыаҕа.

Этиллибит күөн көрсүү 61 киилэҕэ диэри ыйааһыннаахтарга буолуоҕа. Саха сирин 40 саастаах байыаһын утарсааччытынан хотторуу хомолтотун билэ илик Владивосток эрэлэ Артем Бутко буолар. Манна даҕатан эттэххэ, Артем Саха сиригэр төрөөбүт, Кэбээйи улууһун Сангаар бөһүөлэгиттэн төрүттээх.

Григорий Попов MFP панкратиоҥҥа Азия чөмпүйүөнэ, тайскай боксаҕа Арассыыйа, Азия уонна аан дойду чөмпүйүөнэ. Кини UFC аан дойду сүрүн промоушеныгар иккитэ киирсибитэ. Попов бүтэһигин 2022 сыллаахха Алматы куоракка ыытыллыбыт турнирга кыттыбыта, онно Элжан Алиаскарга хотторбута, диэн иһитиннэрэр Sportyakutia.ru.