Грузияҕа үрдүк кыайыы! Дьокуускайдааҕы национальнай гимназия Гран-прины ылла!

Дьокуускайдааҕы национальнай гимназия үөрэнээччилэрэ аан дойду таһымыгар кыайыыны ситистилэр. А.Г. уонна Н.К. Чиряевтар ааттарынан Дьокуускай куораттааҕы национальнай гимназия айар бөлөҕө Грузияҕа бэртээхэйдик кытынна диэн киин куорат дьаһалтатын үөрэҕин управлениета иһитиннэрэр.

Тохсунньу 16-17 күннэригэр Боржоми уонна Цагвери куораттарга «Gold Fest Georgia» диэн бэстибээл буолан ааста. Онно биһиги оҕолорбут муҥутуур кыайыыны – Гран-прины ыллылар.

Гимназияттан 7 «Б» кылаас үөрэнээччилэрэ уонна 10 «В» кылаастан Николай Еттянов кытыннылар. Кинилэр «7 омук – 7 алмаас» диэн ураты туруорууну көрдөрдүлэр. Оҕолор Саха сирин төрүт омуктарын култууратын туһунан нууччалыы уонна английскай тылынан кэпсээтилэр. Туруоруу чаҕылхай үҥкүүнэн түмүктэннэ.

Бу кыайыыны ситиһэргэ уһуйааччылар күүскэ үлэлээтилэр: бөлөх салайааччыта –  7 «Б» кылаас салайааччыта, нуучча тылын уонна литэрэтиирэтин учуутала В.И. Илларионова, үҥкүүнү туруорааччы – Л.И. Иванова-Ылахова.

Дьүүллүүр сүбэҕэ Грузия култууратын үтүөлээх диэйэтэллэрэ биһиги оҕолорбут сатабылларын олус үрдүктүк сыаналаатылар.