ГТО нуорматын толорууга 76 тыһыынчаттан тахса киһи кытынна

«Үлэҕэ уонна оборуонаҕа бэлэммин!» комплексы олоххо киириитин тухары gto.ru порталыгар Саха сирин үрдүнэн 194251 киһитэ регистрацияламмыт. Оттон онно кыттыбыт дьон ахсаана 76442 киһиэхэ тиийбит.

Саха сиригэр ГТО комплексын 27 194 бэлиэтэ туттарылынна, олортон кыһыл көмүһү – 10 527 кыттааччы, үрүҥ көмүһү – 10 012, боруонсаны – 6 655 кыттааччы ыллылар диэн СӨ Баһылыгын уонна Бырабыыталыстыбатын пресс-сулууспата иһитиннэрэр.

«Үлэҕэ уонна оборуонаҕа бэлэммин!» комплекса өрөспүүбүлүкэ олохтоохторун эт-хаан өттүнэн тупсарыыга уонна уопсайынан, маассабай успуорт сайдыытыгар көмөлөһөр. Сүрүн соруга – чэбдигирдии, нэһилиэнньэ бары өттүнэн сайдыытын, успуорка араас көрүҥүнэн ордук дьарыктаналларыгар көҕүлээһин буолар.

ГТО нуораматын 6-тан 70-гар диэри саастаахтар уонна успуордунан утумнаахтык дьарыктанар дьон толоруохтарын сөп. Онуоха gto.ru сайтка регистрацияланыахха наада, хас биирдии кыттааччыга тус идентификационнай нүөмэр бэриллэр. Оттон кыттарга сайаапканы электроннай почтанан эбэтэр тургутууну ыытар кииҥҥэ биэриэххэ сөп. Тургутууну ааһарга тус бэйэҥ буоларгын тулһулуур докумуон уонна быраас көҥүллүүр ыспыраапката баар буолуохтаах.

Санатар буоллахха, ГТО кыһыл, үрүҥ көмүс, боруонса бэлиэлээх абитуриеннар үрдүк үөрэххэ киирэллэригэр БКЭ эбии баалы ылыахтарын сөп. Ону таһынан Саха Өрөспүүбүлүкэтин физическэй култуураҕа уонна успуорка министиэристибэтин бырагырааматынан успуорт эбийиэктэригэр ГТО кыһыл көмүс бэлиэни ылбыттар – 50%, үрүҥ көмүс бэлиэҕэ – 40%, боруонса бэлиэҕэ – 30% чэпчэтиинэн туһаналлара бигэргэнэн турар.

РФ Бэрэсидьиэнэ Владимир Путин көҕүлээһининэн олоххо киллэриллэр «Демография» национальнай бырайыак чэрчитинэн ыытыллар «Успуорт – олох көрүҥэ» федеральнай бырайыак көмөтүнэн дойду үрдүнэн дьон успуордунан уонна физкултууранан дьарыктанарыгар усулуобуйа барыта тэриллэр. 2023 сыл түмүгүнэн Арассыыйаҕа успуордунан утумнаахтык дьарыктанар дьон ахсаана 53% эбэтэр дойду 70 мөлүйүөн олохтооҕо дьарыктанар. 2030 сылга диэри 105 мөлүйүөн киһи успуордунан дьарыктанарын хааччыйар сыал-сорук турар.