«ГТО оонньуулара» сүүмэрдиир түһүмэҕэ түмүктэннэ

Уһук Илин бары эрэгийиэннэригэр бэс ыйын 12 күнүттэн от ыйын 30 күнүгэр диэри хамаандалары талар сүүмэрдиир түһүмэхтэр ыытыллыбыттара. Бу хамаандалар Илиҥҥи экэнэмиичэскэй пуорум кэмигэр ГТО куубагын финалыгар кыттыахтара.

Ол курдук, сүүмэрдиир тэрээһиннэргэ Уһук Илин үрдүнэн 7,6 тыһыынча киһи күрэхтэстэ: 18 сааһыттан үөһэ 4,4 тыһыынча кыттааччы, 14-17 саастаах 3,2 тыһыынча үөрэнээччи уонна 100-тэн тахса идэтийбит атлет, сөбүлээн дьарыктанааччы кытынна.

Барыта 7 көрүҥҥэ илин-кэлин түһүстүлэр: сүүрүү, ырааҕы ыстаныы, тардыныы, сиртэн анньыныы, гиирэни өрө анньыы уо.д.а.

Оттон финалга ааспыт спортсменнар уон баазабай көрүҥҥэ, итиэннэ лазернай бистэлиэттэн ытыыга, муораҕа харбааһыҥҥа, бастакы мэдиссиинискэй көмөнү оҥорорго күрэхтэһиэхтэрэ.

Тэрээһини Арассыыйа ГТО многоборьетыгар федерацията уонна РФ Бырабыыталыстыбатын бэрэссэдээтэлин солбуйааччы – Уһук Илин федеральнай уокурукка РФ бэрэсидьиэнин боломуочуйалаах бэрэстэбиитэлэ Юрий Трутнев дьаһалынан Успуорт министириэристибэтэ ыыталлар.