Хаамыы күнүнэн Дьокуускайга 600-тэн тахса киһи хаама таҕыста

Бүгүн, алтынньы 1 күнүгэр, Арассыыйа үрдүнэн Хаамыы күнэ бэлиэтэнэр. Бу күн Арассыыйаҕа ахсыс төгүлүн ыытыллар. Бастакы маннык тэрээһин Чебоксары куоракка ыытыллыбыта.

Саха сиригэр Хаамыы күнэ алтыс сылын ыытыллар. Бүгүн сарсыарда 10 чаастан Дьокуускай куоракка 600-тэн тахса киһи хаама таҕыста.

Бу туһунан СӨ Физическэй култуура уонна успуорт управлениетын доруобуйаны бөҕөргөтөр салаа инструктор-методиһа Сардаана Евсеева кэпсиир:

— Биһиэхэ, Саха сиригэр, бу тэрээһин алтыс сылын ыытыллар. Быйыл Олимпийскай сэбиэт диэн тэрилиннэ. Бу сэбиэт бэрэссэдээтэлинэн Павел Павлович Пинигин буолла. Сэбиэти СӨ Успуорт министиэристибэтэ, физическэй култуура уонна успуорт управлениета буолан биир сүбэнэн тэрийбиппит. Бэлиэтээн эттэххэ, бу Хаамыы күнэ Олимпийскай сэбиэт иһинэн ыытыллар биир сүрүн тэрээһининэн буолар.

Бүгүн Дьокуускайга уопсайа 600-тэн тахса киһи хаамта. Ол курдук, орто анл үөрэх уонна үрдүк үөрэх кыһаларын устудьуоннара бастакы бөлөххө,  үлэ кэллэктииптэрэ, тэрилтэлэр, сойуустар иккис бөлөххө уонна баҕалаах дьон үһүс бөлөххө хаамтылар.

Бу күрэхтэһии буолбатах. Ол эрээри, биһиги «Бастыҥ спортивнай дьиэ кэргэн», “Аҕам саастаах кыттааччы”, “Бастыҥ тиэхиньикэлээх хаамааччы”, “Бастыҥ таҥастаах хамаанда”, «Бастыҥ тэрилтэ” диэн ааттары иҥэрдибит. Бүгүн аҕам саастаах дьон күнүгэр «Аҕам саастаах кыттааччы” ааты 85 саастаах Степан Абрамовка иҥэрдибит. Успуорду таптааҥ, успуордунан дьарыктаныҥ диэн барыгытын ыҥырабыт!

Сандал Никаноров хаартыскаҕа түһэриилэрэ.