Хаар-муус куорат тутуллан эрэр

Дьокуускайга 202-с түөлбэ аттынан Өлүөнэ өрүс боротуокатыгар Хаар-муус куорат тутулла турар. Бу Хаар-муус куорат, үгэс курдук, сыл аайы аһыллан, үлэлиир. Манна сааскы кэмҥэ оҕо-уруу, дьон-сэргэ сөбүлээн тоҕуоруһар.

Дьэ, чахчы, уһун тымныы кыһыны быһа дьиэҕэ хаайтаран олорон баран, сааскы көй салгыҥҥа сылдьар, оонньуур-көрүлүүр, муус сыыртан сырылыыр, хаҥкылыыр, сүүрэр-көтөр үчүгэй да буоллаҕа! Онтон киэһэ уота-күөһэ сандааран, туспа ураты санаалары саҕар.

Хаар-муус куоракка киирии төлөбүрдээх, ол эрээри, киирэн баран, күнү да быһа сылдьыахха сөп. Сылаас дьиэ баар буолан, ас атыылыыр кафеҕа киирэн аһыахха, итии чэй иһиэххэ, иттиэххэ сөп.

Саамай сүрүнэ, манна уонунан миэтэрэ уһуннаах, уоттаах-күөстээх сыыр буолар. Бу сыыртан сырылаатаххына, дьэ, сааскы кэми туһалаахтык атаардым диэн сананаҕын.

Билигин манна хаар, муус оҥоһуктарын, улахан муус сыыры оҥоро сылдьаллар. Үлэ күөстүү оргуйар. Сылытыллар дьиэ номнуо турбут.

Хаар-муус куорат, үгэс курдук, олунньуттан аһыллыаҕа. Олунньуга, кулун тутарга, муус устарга эрэ үлэлиир, ону да, муус устарга сылыйан, ууллан барар.