Хаарбах дьиэттэн көһөрбөтөхтөрүгэр холуобунай дьыала тэрилиннэ

Арассыыйа Силиэстийэлиир кэмитиэтин салайааччы Александр Бастрыкин Дьокуускай хаарбах дьиэлэргэ олохтоох дьонун үҥсүүлэринэн, кинилэр бырааптарын кэһии быһыытынан көрөн, холуобунай дьыаланы тэрийэргэ сорудахтаата.

Силиэстийэлиир кэмитиэт бэрэссэдээтэлэ А.И. Бастрыкин аатыгар «ВКонтакте» приемнайын нөҥүө Дьокуускай куоракка Семен Данилов уулуссатыгар турар хаарбах дьиэттэн көһөрүү туһунан үҥсүү киирбит. Бу 1966 сылга тутуллубут мас дьиэ букатын хаарбах туруктаах: үрдэ, муостата алдьаммыт, инженернэй тутуулара үлэлээбэттэр, дьиэ анныгар уу туолбут. Дьиэ хаһан баҕарар сууллуон сөп.

2017 сыллаахха дьиэ хаарбах туруктааҕынан ааҕыллыбыта. Былырыын олохтоохтору түргэнник көһөрөр туһунан суут быһаарыыта олоххо киирбитин үрдүнэн, билиҥҥэ диэри толору хааччыллыылаах дьиэ бэриллэ илик. Үгүс үҥсүү, көрдөһүү түмүгэ суох буолбут.

Силиэстийэлиир кэмитиэт силиэстийэлиир управлениета процессуальнай бэрэбиэркэни саҕалаата.

Александр Бастрыкин Силиэстийэлиир кэмитиэт Саха сиринээҕи силиэстийэлиир управлениетын салайааччытын э.т. Шихбале Этибарович Амирсеидовка холуобунай дьыаланы көбүтэргэ уонна силиэстийэ түмүгүн туһунан дакылааттыырга соруйда.