ХААРТЫСКА: АТС эргэ буукката – туһаҕа

Бу күннэргэ бэрт интэриэһинэй сонуну иһиттибит. Бүлүү улууһун Өкүндү нэһилиэгэр кинигэ уларсар буукка туруорбуттар. Бу кинигэ уларсар буукка идиэйэтин нэһилиэк баһылыга Никифор Петров  көҕүлээбит.

— Былырыын нэһилиэк олохтоохторо субуотунньуктуу сылдьан төлөпүөн бууккатын булбуппут. АТС киэнэ этэ, эргэ. Ону булан, интэриэһиргээн, кэргэммин кытта дьиэбитигэр аҕалан урукку чөлүгэр түһэрбиппит.  Онтон, дьэ,  нэһилиэк олохтоохторо кинигэ уларсалларыгар табыгастаах буоллун диэн, аҕалан олохтоох маҕаһыыммыт аттыгар туруордубут, дьон саамай сылдьар сирэ диэн. Сэргээтилэр. Улахан дьон, оҕолор ааҕар кинигэлэрин уурдулар. Уларсаллар. Мин көрдөхпүнэ, оҕолор улахан дьонтон хаалсыбакка сылдьан эрэллэр. Куоракка маныаха майгынныыр кинигэ уларсар долбуурдары эҥин көрөөччүбүн. Дэриэбинэлэргэ, арааһа, суоҕа буолуо, — диэтэ Никифор Владимирович.

Онон өкүндүлэр кинигэни ааҕалларыгар олус үчүгэй, туох да үп-харчы кутуллубакка оҥоһуллубут бырайыага буолбут.  Арай бууккаларын иһигэр хаһыатары эмиэ уурдуннар. Бэрт да буолуо этэ.