Бэрдьигэстээххэ «Үрдэл» түөлбэ Кыайыы 80 сылыгар искибиэри киэргэттэ

Бэрдьигэстээххэ «Үрдэл» түөлбэ олохтоохторо Кыайыы 80 сылын көрсө түөлбэлэр икки ардыларынааҕы күрэх чэрчитинэн искибиэри киэргэттилэр. Кинилэр кыһыл петуния сибэккини олордон, бэлиэ даатаны үйэтиттилэр. Бу туһунан «Үлэ күүһэ» хаһыат иһитиннэрэр.

Бу үлэни олоххо киллэрэргэ улуус баһылыгын Грана улахан көмө буолбут. Түөлбэ салайааччыта Светлана Лю-Фа  үлэ туһунан маннык кэпсиир:

— Сибэкки олордуутугар Снежана, Николай Чемезовтар уоҕурдуу буорунан хааччыйан, улахан көмө оҥордулар. Олохтоохтор ыытыллар үлэни күүскэ өйөөн, маассабайдык кыттыбыттарын бэлиэтиэх тустаахпын. Парасковья Шамаева айылҕа маанылаах көтөрүн – икки кубаны оҥорон бэлэх уунан, үлэбитин ситэрэн-хоторон биэрдэ.

Дьоммут, улаханныын-кыралыын, сибэккилэри бүөбэйдэһэн, оҕолуу көрөн-истэн, биир да күнү көтүппэккэ уу кутан, искибирэбит көмүс күһүнү сайыҥҥылыы көрүстэ. Сибэккилэргэ уу кутуутун уулуссаларынан арааран, кыраапык оҥорбуппут үтүө түмүктэннэ. Түгэнинэн туһанан, түөлбэм бары олохтоохторугар үлэҕэ көхтөөхтүк кытталларын, саҥа сүүрээннэри киллэрэн, олорор сирбит кэрэ көстүүлээх, ыраас, тупсаҕай буоларыгар кыһамньылаах үлэни ыыталларыгар, өйүүллэригэр ис сүрэхпиттэн махталбын тиэрдэбин.

 Вячеслав Алексеев