ХААРТЫСКА: Бу хатыҥҥа күөрэгэй ыллаатын…

Орто дойдуга, төрөөбүт айылҕабытыгар киһи кэрэхсии,  сөҕө-махтайа, соһуйа да көрөрө элбэх. Ким эрэ ол дьиктини аттынан ааһыа, ким эрэ санааҕа ылларыа, ким эрэ хоһооҥҥо-ырыаҕа хоһуйуо.

Биһиги эрэллээх ааҕааччыбыт  Валерий Седалищев-Айылҕан айылҕа биир дьиктитин, соҕотохсуйбут хатыҥы хоһоонугар хоһуйбутун сэргиэҕиҥ.

Олоххо дьулуһуу

Көрүстүм алааспар

Соҕотох хатыҥчаан турарын.

Бэйэбэр тэҥнээн көрөммүн

Сүрэҕим нүөлүйэн ылбыта.

 

Ийэ буортан тутуһан,

Соҕотох, сулумах, кураанах,

Сонньуйбут, эмэҕирбит,

Олох эрэйин билбит көрүҥнээх

Турарыҥ, турарыҥ, турарыҥ.

 

Кинини көрөн сөхтүм,

Кини күүстээх санаатын.

Сөхтүм кини тулуурун,

Олоххо талаһар күүһүн.

Киэһээҥҥи күн сарыалын атаара

Далбаатыы турарга дылыта,

Эбэтэр сүтэрбит доҕорун ыҥыран,

Далбаатыы турара дуу?

 

Билбэппин кини дьылҕатын,

Билбэппин кини олоҕун,

Билбэппин кини санаатын,

Билбэппин хайдах буолбутун.

Ол эрэн, киниттэн мин санаам күүһүрдэ.

Кини миэхэ кэпсиир курдуга —

Олоххо, олоххо  дьулуһууну,

Олох бу сиргэ күндүтүн.

 

Быраһаай, хатыҥым барахсан,

Санаатын түһэрбэт хатыҥым.

Тураахтаа, охтума, кэхтимэ,

Көрүс күн аайы сарыалгын.

Аттыгар кэрэ хатыҥ үүнүөҕэ,

Күөрэгэй чыычааҕыҥ ыллыаҕа,

Хойуу, күөх сэбирдэххин

Алаас тыала хамсатыаҕа.