ХААРТЫСКА: Бүлүүгэ Куорат күнүн киэҥ далааһыннаахтык бэлиэтээтилэр

Ааспыт өрөбүллэргэ Бүлүү куорат төрөөбүт күнүн киэҥ далааһыннаах, элбэх тэрээһиннээх, үөрүүлээх бырааһынньыгынан бэлиэтээтэ.

«Төрөөбүт күҥҥүнэн, тапталлаах куоратым!» диэн уопсай ааттаах тэрээһиннэр күн устата бардылар уонна куорат бары муннуктарын, устуоруйа кииниттэн саҕалаан, саҥа «Ыллыыр кумахтар» набережнайга тиийэ хаптылар.

Быйылгы Куорат күнүнэн бүлүүлэр олохторун-дьаһахтарын тупсарар, куорат эйгэтин өссө тупсаҕай оҥорор соруктаах хас даҕаны суолталаах эбийиэк үлэҕэ киирдэ. Олортон биир саамай күүтүүлээх, сүрүн түгэнинэн Уһук Илин федеральнай уокурукка киирэр РФ субъектарыгар табыгастаах куорат эйгэтин тэрийиигэ бастыҥ бырайыактар Бүтүн Арассыыйатааҕы куонкурустарын кыайыылааҕа буолбут, саҥардыллыбыт «Ыллыыр кумахтар» набережнай аһыллыыта буолла.

Өссө биир улахан ситиһиинэн Бүлүү куорат эргийэр суолун тутуута түмүктэммитэ буолар. Бу суол куорат тырааныспар инфраструктуратын биллэ тупсаран, киин уулуссаларга ноҕуруусканы аччатан, массыына хамсааһынын көдьүүстээх оҥоруоҕа. Суол Аммосов, Интернациональнай уонна Иона Попов ааттарынан үс муниципальнай уулуссаны эргийэ барар, ол түмүгэр суолга хаайтарыыны суох оҥорон, хамсааһын куттала суох буолуутун үрдэтиэҕэ. Ону таһынан, Эргэ куорат Чернышевскай уулуссатыгар баар сирдэрин-уоттарын саҥардар үлэлэр ыытылыннылар. Бу үлэлэр саҥа набережнайы кытта дьүөрэлэһиннэриллэн, биир кэлим архитектурнай ансаамбылы үөскэттилэр уонна куорат бу чааһын устуоруйалыы уратытын харыстыырга кыах биэрдилэр.

Бүлүү куорат – баай устуоруйалаах, албан үгэстэрдээх, үлэһит, дьоҕурдаах дьонноох-сэргэлээх куорат. Түөрт үйэ кэриҥэ устатыгар  Бүлүү улууһун култууратын, үөрэҕириитин уонна экэниэмиэкэтин биир суолталаах киининэн буолар. Бүгүн Бүлүү – бэйэтин ураты көстүүтүн, сиэрин-майгытын сүтэрбэккэ, тэтимнээхтик сайда турар аныгы куорат.