ХААРТЫСКА: Чалбаҕы үрдүнэн ыстанар балерина куйаар ситимин толордо

Дьокуускайга фотограф Василий Винокуров чалбаҕы үрдүнэн ыстанар балеринаны хаартыскаҕа түһэрэн социальнай ситимнэринэн тарҕатта.

Бу иннинэ кини чалбахха оҥочонон устар куорат олохтооҕун хаартыскаҕа хатаан тарҕаппыта биллэр. Бырайыак идиэйэтин туһунан фотограф Василий Винокуров СИА-ҕа кэпсээтэ.

«Мин араас хаартыскалары түһэрэбин, ол иһигэр дьону-сэргэни долгутар кыһалҕалар тиэмэлэригэр. Билигин Дьокуускайга саамай тирээн турар кыһалҕа — чалбах уонна бадараан. Бу иннинэ киин куорат олохтоохторо чалбаҕы үрдүнэн ыстаналларын хаартыскаҕа түһэрэн тарҕаппыттара уонна балерина курдук сананабыт диэн суруйбуттара. Ол иһин дьиҥнээх балерина чалбах үрдүнэн ыстанарын хаартыскаҕа хатыырга санаммытым. Сөптөөх кыыһы буларбар билэр дьонум көмөлөспүттэрэ. Кини бырайыакка кыттарга сөбүлэспитэ эрээри, онно-манна биллиэн-көстүөн баҕарбат», — диэн Василий Винокуров кэпсээтэ. Фотограф хаартыскаҕа балеринаны Залог оройуонугар уонна Чепалов аатынан уулуссаҕа түһэрбит.

«Биһиги бастакы түбэспит сирбитигэр тута көрсүбүппүт уонна куоракка чалбах элбэх буолан, миэстэтин көрдүүргэ бириэмэ ыыппатахпыт — тутатына үлэлээн барбыппыт. Чаас аҥаарынан үлэбитин барытын түмүктээбиппит. Куорат сулууспалара чалбаҕы хачайдыыллара көстөр эрээри, барытын ситиспэттэр. Сыл ахсын сөҥүү нуорматтан аһара үрдүк түспүтэ дииллэр, ол гынан баран Дьокуускайга бачча чалбах үөскээбэтин туһугар сөптөөх үлэни былааннаан ыытыахха наада дии саныыбын», – диэн Василий Винокуров бэлиэтиир.