ХААРТЫСКА: Далырга арбуз эрэ буолбакка, клубника эмиэ өлгөмнүк үүнэр

Бэҕэһээ социальнай ситимнэринэн Үөһээ Бүлүү улууһун Далыр нэһилиэгин олохтооҕо Розалия Семенова 200-н тахса арбуһу үүннэрбитин туһунан сонун тарҕаммыта. Дьон-сэргэ биһиги да дьоммут соҕуруу дойдулартан итэҕэһэ суох арбууһу олордоллор эбит диэн сөхпүттэрэ-махтайбыттара.

Оттон бүгүн Розалия Семенова үүннэрбит клубникатын хаартыскалара ситимнэри тилийэ көттүлэр. Онон арбуз эрэ буолбакка, клубника, атын даҕаны оҕуруот астарын сатабыллаах хаһаайка өлгөмнүк үүннэрэр.

Розалия Семенова быйылгы үүнүүтүн туһунан маннык кэпсиир:

— Быйыл үүнүү өлгөм. Арбузтарбын көрбүт буолуохтааххыт. Онтон клубниканы 350 уктан 50 кг курдугу ыллым. Үксэ «Хаандыга» диэн суорт. Дьиҥэ «Хаандыга» диэн норуот ааттаабыт аата. Хаандыгаҕа олорор Наталия Федоровна 40-тан тахса сыл бэйэтэ сиэмэнэн олордор клубниката. Маннык суортаах диэн ааттаабат, онон биһиги «Хаандыга» диибит. Азия, Мурано, Клери, Джоли, Альбион, Альба, Купчиха диэн суортар эмиэ бааллар. Ол эрээри аҕыйахтыы устуукалар, олору саҥа элбэтэ сылдьабын. Быйыл иккис сылын кыстаата. Клубниканы олордубутум 15 сыл буолла. Былырыын күһүҥҥүттэн дьэ саҥа, хайдах үчүгэйдик үүнэриэххэ, харайыахха сөбүн үөрэппитим. Быйыл саас Бүлүү улууһун Кыадаҥдатыгар дьэдьэн үүннэриитинэн дьарыгырар Айталина Захаровна Томская телеграм-ханаалыгар  үөрэтэр үөрэҕэр киирэн, хайдах сөпкө аһатарга, көрөргө-истэргэ үөрэммитим. Эһиил өссө элбэтээри саҥа сир бэлэмнээн арассаада олордо сылдьабын. Маны таһынан биэ эмиийин угу ылан олордубутум. Эһиил үчүгэйдик кыстаатаҕына, астаныахтаах. Бу үүннэрбит астарбытын бэйэбит сиибит, ордугун атыылыыбын. Клубниканы аҕыйах киһи бэйэтэ хомуйан ыларыгар көҥүллээбитим. Урут моркуобу олордон, атыылыырым, билигин сиирбитигэр эрэ үүннэрэбин.

ХААРТЫСКА: далырдар 200-тэн тахса арбуһу хомуйдулар