ХААРТЫСКА: Дьокуускай ортотугар ньургуһун үүннэ

Бүгүн, ыам ыйын 18 күнүгэр, Саха сиригэр Ньургуһун сибэкки күнүн бэлиэтиибит. Ньургуһун күнэ Саха сиригэр 2004 сыллаахтан бэлиэтэнэр.

Бу бэлиэ күнү биллэр суруналыыс Иван Ушницкай көҕүлээн олохтообута. Дьиҥэ, бу бэлиэ даатаны официальнайдык ылымматахтара эрээри, саас маҥнай тоҥ буору тобулан тахсар сибэккини кэрэхсээн, уруйдаан норуот бэйэтэ ылынан бэлиэтиир.

Дьокуускай куорат киинигэр, Бэчээт дьиэтин таһыгар массыыналар тохтуур сирдэригэр биир бөлөх ньургуһун үүммүтэ уратытык көһүннэ. «Ким эрэ аҕалан анаан олордубутун курдук», — диэн киин уулуссанан дьон сөҕө-махтайа көрөн ааһарын бэлиэтээн хаартыскаҕа түһэрдибит.