ХААРТЫСКА: Доллуга түмсүүлээх муҥха буолан ааста

Сэтинньи 9 күнүгэр Горнай улууһун Бэрдьигэстээх нэһилиэгин Доллу учаастагар үгэс буолбут күһүҥҥү муҥха буолан ааста. Тэрээһин саха сиэрин-туомун толору тутуһан, аал уоту оттон, Байанайы алаадьынан күндүлээһинтэн уонна арчылыыр алгыстан саҕаланна, диэн «Эркээйи» хаһыат суруйар.

Бу күн Доллу күөлүгэр олохтоохтор оҕо-аймахтыын 30-ча буолан кытыннылар. Улахан дьону кытта тэҥҥэ үүнэр көлүөнэ ыччаттар үлэлээн, ойбон мууһун ыраастаатылар, балык кутар сири бэлэмнээтилэр. Улахан дьон үүнэр көлүөнэни өбүгэ үгэһигэр бэйэлэрин холобурдарынан уһуйаллара – бу муҥха сүрүн сыаннаһа буолла.

Муҥханы Бэрдьигэстээх олохтооҕо, күөл хаһаайына Николай Плотников тэрийэн ыытта. Тэрээһиҥҥэ ыаллыы Мэҥэ Хаҥалас улууһун Майа сэлиэнньэтиттэн Дмитрий Сидоров уонна Александра Брызгалова кэлэн кыттыыны ыллылар.

Мустубут дьон-сэргэ ирэ-хоро кэпсэтэн, айылҕаҕа сынньанан, санаалара көтөҕүлүннэ. Күөх Боллох күндүтэ, көмүс хатырыктаах собото хойуутук түбэһэн, балыксыттар илии тутуурдаах, өттүк харалаах тарҕастылар.

Кыттааччылар ити курдук түмсүүлээх, үгэһи тутуһар тэрээһини иилээн-саҕалаан ыыппыт Николай Плотниковка уонна Доллу олохтоохторугар истиҥ махталларын тириэрдэллэр. Бу курдук тэрээһиннэр нэһилиэк олоҕун сэргэхситэллэр, көлүөнэлэр ситимнэрин бөҕөргөтөллөр.