ХААРТЫСКА: Горнайга аан дойдуга саамай улахан чороон баар…

Горнай улууһугар сэдэх, гигант-эспэнээти көрүүгэ таһаардылар. Мытаах нэһилиэгэр аан дойдуга саамай улахан чороон баар буолла. Саха мааны ыалдьытымсыйыытын бэлиэтин норуот маастара Андрей Лукич Малышев оҥорбут. Чороон кэмээйэ рекорду олохтуур  диэн @silatrudagorny ТГ-ханаал иһитиннэрэр.

Чороон «Бары суол Мытаахха сирдиир» бырайыак чэрчитинэн ыытыллар быыстапкаҕа анаан оҥоһуллубут уонна ааптар бэйэтинэн сүрэхтэниитигэр кэлэ сылдьыбыт.  Түмэл сэдэх дьикти эспэнээти бэйэ хараҕынан көрөргө уонна өйдөбүнньүк хаартыскаҕа түһэргэ ыҥырар. Чороону  Горнай улууһа, Дьиикимдэ сэлиэнньэтэ, Ленин уул. 13, Мытаахтааҕы мусуой-галереяҕа көрүөххэ сөп. Үлэлиир кэмэ: бн-бт, 9:00–18:00, субуота уонна баскыһыанньа – өрөбүл күннэр.

Түмэл пуондатыгар 6555 эспэнээт харалла сытар, ол иһигэр Саха сирин норуодунай суруйааччылара бырааттыы Сэмэн уонна Софрон Даниловтар өйдөбүнньүк кэбиниэттэрэ уонна Афанасий Осипов галереята.