ХААРТЫСКА: Горнайга кыһыл моойдоох сэдэх соловей көтөр сымыыта көстүбүт

«Биһиги судаарыстыбаннай иниспиэктэрбит Горнай улууһугар уйаланар көтөрдөрү иккис сылын субуруччу кэтээн көрөр. Бу туһунан «Заповедная Якутия» телеграм-ханаал суруйар.

Ааспыт сылга Сардаана Кривошапкина сэдэх көтөрү – кыһыл моойдоох соловейы хаартыскаҕа түһэрбитэ. Бу сырыыга кыһыл моойдоох соловей чыычаах халлаан күөҕэ сымыыттара сэлиэнньэ иһиттэн көһүннүлэр, бу туһунан олохтоохтор иһитиннэрбиттэр.

Иниспиэктэр «фотоловушка» туруорбут, онно кыһыл моойдоох соловей хабыллыт: сэдэх көтөр сымыыттарын сэрэнэн көннөрөр, баттыы сытар уонна кэмиттэн-кэмигэр аһыы-сии тахсар. «Билигин чоппуускалар тахсалларын кэтэһэбит», – диэн заповедник үлэһиттэрэ кэпсииллэр.

Бу чыычаах ырыатын ыам ыйыгар-бэс ыйын саҕаланыытыгар истиэххэ сөп. Ити кэмҥэ кини ыраах дойдулартан Саха сиригэр төннөн кэлэр уонна хоту сиргэ аҕаарын булар, сымыыттыыр уонна оҕолорун иитэн таһаараар. Кыһыл моойдоох соловей – кэлэр-барар көтөр, Соҕуруулуу-Илиҥҥи Азияҕа, Соҕуруу Кытайга, Индияҕа кыстыыр. Аһылыгар сиргэ, от быыһыгар, охтубут маска булар үөннэри-көйүүрдэри бултуур, ити гынан тыаны харыстыыр. Ону таһынан отон сииллэр.

Уйатын тыһы көтөр сиргэ, талах уонна үрдүк от быыһыгар туттар. Тутар матырыйаала – сэбирдэх, от, лабыкта. Соловей үксүгэр 4-5 сымыыттыыр уонна икки нэдиэлэ кэриҥэ баттыыр. Ол кэннэ эдэр соловейдар кынаттанан, төрөппүттэрин уйатыттан көтөллөр.