ХААРТЫСКА: Халбаакылар түөлбэнэн «Идэһэ күрэҕэ» сэргэх тэрээһини ыыттылар

Сэтинньи 15 күнүгэр Бүлүү улууһун Халбаакы нэһилиэгэр түөлбэлэр икки ардыларыгар «Идэһэ күрэҕэ» сэргэх тэрээһин үрдүк таһымнаахтык буолан ааста. Бу күрэҕи нэһилиэк «Тускул» норуот айымньытын дьиэтэ уонна олохтоох дьаһалта тэрийэн ыыттылар, диэн Бүлүү улууһун дьаһалтатын пресс-сулууспата сырдатта.

Күрэх сүрүн сыалынан-соругунан сиэри-туому тутуһуу, дьону-сэргэни кыстыгы этэҥҥэ ааһарыгар арчылааһын, нэһилиэккэ саха итэҕэлин сөргүтүү, өбүгэлэрбит үгэстэрин тарҕатыы буолла. Түөлбэлэринэн күрэхтэһии 4 түһүмэҕинэн ыытылынна: сүөһүнү түргэнник охторуу, ыраастык сүлээһин, ис ырытааһын, ⁠таҥкыччаҕын ыраастааһын — ыраастык туттуу.

«Халбаакы» ПК түөрт сүөһүтүн уонна «Эркин» КФХ Гаврил Павлов биир сүөһүтүн тутуннубут. Тэрээһиҥҥэ Халбаакы биэс түөлбэтин дьоно көхтөөхтүк кыттыыны ыллылар. Бастакы миэстэни — «Тоһуу» түөлбэ, иккис миэстэни — «Алаһа» түөлбэ, үһүс миэстэни — «Төрүт» түөлбэ ыллылар. Ону тэҥэ «Саһарҕа» уонна «Быһыттаах уоттара» түөлбэлэр көхтөөхтүк кытыннылар. Кыттааччылары, көрөөччүлэри «Тускул» норуот айымньытын дьиэтин үлэһиттэрэ итии миининэн, минньигэс алаадьынан күндүлээтилэр. Түмүгэр бары кыттааччылар сыаналаах бириистэринэн наҕараадаланнылар, анал аат кыайыылаахтара спонсордар туруорбут бэлэхтэрин туттулар. Спонсордарбытыгар — урбаанньыттар Самсонов А.М., Павлов Г.С., Халбаакы нэһилиэгин баһылыгын солбуйааччы Уварова В.В., «Тускул» НАДь салайааччыта, «Гринвей» экологическай хампаанньа лидера Эверстова Е.А., «Тускул» НАДь уус-уран салайааччыта, норуот эмчитэ Верховцева Т.П. махталбытын тиэрдэбит. Бары тэрийээччилэргэ, ПК «Халбаакы» салайааччытыгар Протопопов В.Р. уонна үлэһиттэригэр, «Эркин» КФХ салайааччытыгар Павлов Г.С., спонсордарга, дьүүллүүр сүбэҕэ, кыттааччыларга, көрөөччүлэргэ махтанабыт», — диэн сиһилии нэһилиэк баһылыга Алексей Васильев кэпсээтэ.