ХААРТЫСКА: Аатырбыт «Маатта» тиит маска куоластаа

Саха сиригэр аатырбыт «Маатта» тиит маһа «Российское дерево года – 2025» куонкуруска куоластааһыҥҥа кыттар. 200 саастаах Горнай улууһун аарыма маһа «Дойду сүрүн маһа» аатын ылар иһин киирсэр.

«Маатта» тиит маска rosdrevo.ru саайтка киирэн куоластыахха сөп (испииһэккэ 64№-дээх).

Санаттахха, былырыын күһүн Бэрдьигэстээххэ Маатта кытылыгар дьикти улахан тиит маһы ойуур хаһаайыстыбатын маастара Мария Данилова булбута. Ол кэнниттэн Василий Филиппов аатынан Горнай улууһун гимназиятын үөрэнээччилэрэ Гриан Сидоров, Айсен Александров, учууталлар Елена Алексеева, Анжелика Петрова ойуур хаһаайыстыбатын үлэһиттэрин кытта маһы үөрэтэн, чинчийэн, тиит сааһын быһа холоон, 200 буолуон сөп диэн быһаарбыттара.

Тиит мас уһуна 15 миэтэрэҕэ тиийэр. Ону таһынан тиит мас «Деревья — памятники живой природы» диэн Арассыыйатааҕы бырагыраамаҕа киллэриллэн, ураты харыстанар мастарын национальнай реестригэр 1441№-дээх пааспардаммыта.