ХААРТЫСКА: Майаҕа улуустааҕы “Идэһэ”  дьаарбаҥка үгүс дьону муста

Сэтинньи 23 күнүгэр улуустааҕы “Идэһэ” атыы-эргиэн дьаарбаҥката Майа сэлиэнньэтин олохтоохторугар уонна ыалдьыттарыгар тэриллэн ыытылынна.

Дьон-сэргэ уһун, тымныы кыһыҥҥа бэлэмнэнэн, тыа хаһаайыстыбатын бородууксуйатын хамаҕатык атыыласта. Тэрээһин үөрүүлээх аһыллыытыгар улуус баһылыга Дмитрий Тихонов, Майа сэлиэнньэтин баһылыга Алексей Неустроев идэһэ бырааһынньыгар мустубут бар дьону эҕэрдэлээн туран, кэлбит кыстыгы этэҥҥэ көрсөллөрүгэр баҕардылар. Бу күн улуус нэһилиэктэриттэн 76 атыыһыт кыттыыны ылла. Улуус хаһаайыстыбалара, урбаанньыттара, агрооскуолалар уонна биирдиилээн дьон 14 туонна эти, эттэн оҥоһуллар бородууксуйаны, үрүҥ аһы, бэйэ оҥорбут соҕотуопкаларын, бурдук астарын, балык арааһын хамаҕатык атыылаатылар.

Дьаарбаҥка чэрчитинэн “Көрдөөх стартар” хамаанданан бастыыр иһин күрэх ыытылынна. Уопсайа биэс хамаанда кыттыбытыттан кыайыылааҕынан М.К. Попова аатынан Майатааҕы оҕо ускуустубатын оскуолатын хамаандата таҕыста, иккис миэстэни В.П. Ларионов аатынан Майатааҕы орто оскуола хамаандата уонна үһүс миэстэ Ф.Г. Охлопков аатынан Майа орто оскуолатын үлэһиттэрэ буоллулар. Күрэх кыайыылаахтара мэтээлинэн уонна Павловскайдааҕы үүт собуота, Хорообуттааҕы «Алаас Ас», Төҥүлүтээҕи «Хоту» ТХПК туруорбут бириистэринэн наҕараадаланнылар.

Идэһэ бырааһынньыга быйыл, өрүү буоларын курдук, өрөбүл күҥҥэ түбэһиннэрэн үгүс дьону муста. Дьаарбаҥка кыттыылаахтара атыыласпыт бородууксуйаларын тиэйэллэригэр көмө буолбут улуус, Майа тэрилтэлэрин үлэһиттэригэр махталларын биллэрдилэр, диэн Мэҥэ Хаҥалас улууһун дьаһалтатын пресс-сулууспата иһитиннэрэр.