Хаартыска: От ыйын 12 күнэ – Фотограф күнэ

От ыйын 12 күнэ – Фотограф күнэ. Тоҕо бу күн талыллыбытый? Икки быһаарыы баар.

Бу күн Сибэтиэй Виринея (Вероника) ытыгыланар күнэ. Иисус Христос Голгофаҕа кириэһин сүгэн иһэн ыйааһыҥҥа баттатан тобуктаабытыгар, бу дьахтар сүүрэн тиийэн уу иһэрдибит уонна былаатынан  сирэйиттэн көлөһүнүн соппут. Дьиэтигэр тиийэн баран былаатыгар таҥара мэтириэтэ иҥэн хаалбытын көрбүт. Онон Виринея бастакынан мэтириэти уһулан ылбыт киһинэн ааҕыллар, аан дойду фотографтара кинини араҥаччылыыр сибэтиэйинэн ааҕаллар.

Иккис быһаары арыый судургу – бу күн 1854 сыллаахха Джордж Истмен төрөөбүт. Аан дойдуга биллэр хампаанньа төрүттээччитэ хаартысканы дьон барыта туттар чэпчэки оҥорбут киһинэн ааҕыллар.

Фотограф идэтэ уустук, элбэх үлэттэн, үөрэхтэн тахсар. Ол эрэн, аныгы үйэ хаартыскаҕа түһэриини киһи барыта күннэтэ туттар дьарыгар кубулутта. Онон, бары кэриэтэ Фотограф күнүн бэлиэтиир бырааптаахпыт диэххэ сөп. Кэрэни, дьиктини таба көрөөт хаартыскаҕа түһэрэ сылдьар буоллахха, кэнники ааспыт кэмнэри өйдүүргэ көмөлөһүө. Бу анныгар араас сылларга түһэрбит сайыҥҥы хаартыскаларбын уган киһиргиим. Барыгытын бэлиэ күнүнэн эҕэрдэлиибин!

«Саха Сирэ» хаһыат суруйар суруналыыһа Егор Карпов.