ХААРТЫСКА: Саха сирин үрдүнэн метеор умайда

Метеор сэтинньи 8 күнүн түүнүгэр Покровскайдыыр тракт суолун үрдүнэн умайбыт. Биллибэт эбийиэк хараҥа халлааҥҥа сырдаан көстөр видеотын туоһулар – киин куорат олохтоохторо социальнай ситимнэринэн тарҕаттылар.  Метеор хара халлааҥҥа эмискэ сандааран умайар уонна сүтэр.

Астрономнар эбийиэги болид диэн быһаараллар – сырдык метеор. Билигин эбийиэк бары чаастара халлааҥҥа умайбыттарын эбэтэр сиргэ түспүттэрин быһаарар кыах суох.

«Видеоҕа олус сырдык метеору көрөбүт – ити болид. Атмосфераҕа метеор умайар көстүүтэ», — диэн астрономнар быһаардылар.

Оттон учуонайдар быһаарбыттарынан, видеоҕа уһуллубут көстүүнү метеорит диир сыыһа — ити тиэрмин космостан сиргэ түспүт эбийиэктэргэ сыһыаннаах.