ХААРТЫСКА: Табаһыттар айылҕа сэдэх көстүүтүн хаартыскаҕа түһэрдилэр

Анаабыр улууһун таба ыстаадатын үлэһиттэрэ этиҥнээх ардах кэмигэр сөҕүмэр кэрэ, киһини умсугутар көстүүнү хаартыскаҕа түһэрдилэр.

Бу хаартыскалары «Анаабыр уоттара» хаһыат ТГ-ханаала таһаарда.

Анаабыр улууһа – Саха сирин саамай хотугу оройуона. Үксүн маннык кытархай өҥнөөх былыттар күн тахсар эбэтэр киирэр кэмигэр көстөллөр. Күн уота атмосфераҕа дириҥник өтөн киирэн, сырдык кыһыл, эбэтэр саһархай өҥнөр  дьүөрэлээн, былыт эмиэ итинник өҥнөнөр.

Айылҕа барахсан дьикти эриэккэс көстүүнү айан таһаарбыта дьону-сэргэни сөхтөрдө. Табаһыттар туундара тыйыс айылҕатын кытта алтыһан, бу сэдэх кэрэ көстүүнү хаартыскаҕа түһэрэн үйэтитэн, аан дойдуга көрдөрбүттэригэр махтал буолуохтун.