ХААРТЫСКА: Уус Алдан Далбар хотуна виноград өлгөм үүнүүтүнэн сөхтөрдө

Саха сиригэр виноград – бу остуоруйа буолбатах, олох кырдьыга. Уус Алдан улууһун Түүлээх нэһилиэгэр олохтоох Зинаида Бочкарёва минньигэс кишмиш винограды үүннэрэн, бастакы үүнүүтүн хомуйда. Бу туһунан «Мүрү саһарҕата» хаһыат эрэдээксийэтэ иһитиннэрэр.

«Мин оҕуруоппар үксүн сибэккилэр үүнэллэр — цинния, махровай петуния, гладиолус, мирабилис, тунбергия, львиный зев, шток-роза. Соторутааҕыта биэ эмиийэ олордубутум, билигин отоннонон эрэр. Хаптаҕас, монньоҕон, акация, вишня, жимолость бааллар. Арбуз үүннэрэбин – 35 устуука», — диэн кэпсиир хаһаайка. Ол эрээри, дьон барыта виноград үүммүтүттэн олус сөхтө. Угун Зинаидаҕа уола Володя 2022 сылга саас бэлэхтээбит. Үүнээйи хотугу тыйыс усулуобуйаҕа тыыннаах хааларын туһугар, кини маннык ньыманы туттар: кыһынын угун биэдэрэҕэ уган баран, муоста анныгар кыстата уурар, оттон саас тэпилииссэҕэ төттөрү олордор.

«Быйыл уга саҥа үнүгэстэннэ, сорохторо сибэккилэннилэр. Үүнүүтэ аҕыйах эрээри, биһиги дойдубутугар улахан үөрүү. Кишмиш диэн суорт, отонноро кыра эбит, олус минньигэстэр», — диир Бочкарева. Кини этэринэн, виноград күнү, сиккиэр тыалы уонна киэҥ-куоҥ сири сөбүлүүр. Саас сибэккилэрэ үчүгэйдик турдулар диир хаһаайка. «Мин сэбирдэхтэригэр да, умнастарыгар да ууну кутабын. Сиэннэрим отоннорун сөбүлээн сииллэр. Бу дьарык олус интэриэһинэй эбит. Быйыл өссө кукуруза үүннэ», — диэн үллэстэр Зинаида. Түүлээх нэһилиэгин олохтооҕун кэпсээнэ биири дакаастыыр: баҕа санаа уонна тулуур баар буоллаҕына, Саха сирин тыйыс усулуобуйатыгар соҕурууҥҥу үүнээйилэриттэн өлгөм үүнүүнү хомуйуохха сөп.

Туйаара Ушницкая, Түүлээх нэһилиэгэ