ХААРТЫСКА: Жатайга даачаҕа көтөр кутуйаҕы туппуттар

Жатай олохтооҕо даачатыгар көтөр кутуйаҕы туппут. Тирии кынаттаах хаартыската соторутааҕыта социальнай ситимнэринэн тарҕанна.

Көтөр кутуйахтар Саха сиригэр соҕуруу уонна киин улуустарыгар көстөллөрө баар көстүү, ол эрээри тымныы тыйыс усулуобуйаттан сылтаан ахсааннара олус аҕыйах. Көтөр кутуйахтарын тарҕаныыларын хотугу кыраныыссата Бүлүү өрүһүнэн эбэтэр онтон арыый хоту диэкинэн ааһар диэн ааҕыллар. Саха сирин хотугулуу-илинигэр тирии кынаттаахтар тарҕаныыларын кыраныыссата үөрэтиллэ илик. Дьааҥыттан хоту уонна Халыма алын тардыытыгар көтөр кутуйахтары биирдиилээн көрбүт түбэлтэлэр биллэллэр.

Көтөр кутуйахтар, атын кыыллар курдук, бактериянан уонна вируһунан сыстыганнаах ыарыылары, ол иһигэр киһиэхэ кутталлаахтары, тарҕатааччы буолуохтарын сөп. Көтөр кутуйахтар үгүстүк тас паразиттардаах (эктопаразиттардаах) буолаллар, кинилэр ыарыыны тарҕатыыга кыттыһыахтарын сөп. Көтөр кутуйахтары көрсүбүттэр, бу дьиикэй кыыл буоларын өйдүөхтэрин наада уонна тыыппаттара ордук.

Көтөр кутуйах дьиэҕэ киирдэҕинэ тугу гыныахха нааданый?:

• Куттуо суохха, илиинэн тыытыа суохха, үтүлүгүнэн уонна таҥаһынан эрэ тутуохха наада;
• Кутуйаҕы сэрэнэн дьиэттэн таһаарабыт;
• Сылаас хоско киллэрэр сатаммат —  +15°C кыраадыска өлүөхтэрин сөп.