ХААРТЫСКАЛАР: Сахалыы суруйарга тоҕо сыыһабыт?

2026 сыл кулун тутар 1 күнүттэн уопсастыбаннай сирдэргэ вывескалар уонна ыйар бэлиэлэр аҥардас нууччалыы тылынан суруллуохтаахтар диэн ирдэбил олоххо киирээри турар. 

Арассыыйа Бэрэсидьиэнэ Владимир Путин нуучча тылын көмүскүүр туһунан сокуоҥҥа илии баттаата. Ирдэбил быһыытынан, аны бары вывескалар, суруктар уонна тас баннердар аҥардас нууччалыы тылынан суруллуохтара, диэн эрдэ иһитиннэрбиппит.

Оттон Дьокуускайга маҕаһыын ааттарын, вывескаларын, ыйар бэлиэлэрин, сэрэтэр суруктарын нууччалыы уонна сахалыы тылынан эмиэ суруйаллара кэрэхсэбиллээх. Ол эрээри, сахалыы тылбааһыгар олус элбэх вывескаҕа сыыһалаах буоларын бэлиэтээн, хаартыскаҕа түһэртээтибит:

Атыы-эргиэн киинигэр киирэр ааҥҥа «Бэйэн диэки» диэн суруйан сыһыарбыттар. «БэйэҤ диэки» диэн сөпкө суруллуохтаах.

Бу сурукка эмиэ Н оннугар Ҥ буолуохтаах — табахтаамаҤ диэн.

Уһуйаан диэн тыл күннээҕи олохпутугар-дьаһахпытыгар үгүстэ туттуллар буолла. Урут оҕо саада диэн туруору тылбаастаан туттарбыт. Ол эрээри, оҕо уһуйаана диир эмиэ олуона соҕустук иһиллэр. Уһуйаан оҕо сылдьар тэрилтэтэ буолара биллэр — ыччат даҕаны, аҕам саастаах дьон даҕаны уһуйааннара суохтар буоллаҕа.

Сэрэтиигит иһин махтал! ХалтАраан диэн сөпкө суруллубута буоллар,  олус бэрт буолуо этэ!

Үгүс маҕаһыыҥҥа киириигэ үлэ кэмэ чопчутук ыйыллан суруллара хайҕаллаах. Сахалыы үлэ кэмэ, үлэ эрэСиимэ (эрэһиимэ буолбатах) диэн суруллубут буолааччы. Итиэннэ бу хаартыскаҕа өрөбүл диэн тылга эмиэ сыыспыттар эбит.

Бу сурукка үлэлиир кэмэ диэн суруйбуттар, эрэсиим буолбатах. Ол эрээри, үлэлИИр диэн уһун аһаҕаска сыыспыттар. Аны «оробүлэ суох» (өрөбүлэ суох) үлэлииллэр эбит.