ХААРТЫСКАЛАР: Сунтаарга мас тардыһыытын күрэҕэ ыытылынна

Сунтаарга бүгүн Сергей Зверев-Кыыл Уола төрөөбүтэ 125 сылыгар аналлаах өрөспүүбүлүкэтээҕи Үрүҥ Тунах саҕаланна.

Ыһыах үөрүүлээх аһыыллыытын  сиэрин-туомун кэннэ араас күрэхтэр саҕаланнылар.

Мас тардыһыытын күрэҕэ хас да ыйааһыҥҥа ыытылынна.

Күрэҕи саха успуордун солбуллубат кэмэнтээтэрэ Александр Васильев-Көрдүгэн иилээтэ.

Ыарахан ыйааһыҥҥа 2008 с.т., 10 кылаас үөрэнээччитэ, Кабардино-Балкарияҕа ыытыллыбыт чемпионат кыайыылааҕа, Сунтаар улууһун абсолютнай чемпиона Зафарджон Решетников мас тардыһыытыгар Добун ыһыах Аар Дархан үрдүк аатын ылла! Улуус дьаһалтатыттан 30 тыһ. солк.сэртипикээтинэн наҕараадаланна.

75 кг диэри ыйааһыннаахтара биэс бөҕөс илин-кэлин түһүстэ. Мас тардыһыытыгар өрөспүүбүлүкэ биэс төгүллээх чемпиона, Аллыҥаҕа физкултуура учуутала  Тимофей Большаков кыайыыны ситиһэн, улуус дьаһалтатыттан 60 тыһ. солк., Сергей Зверев мөссүөннээх мэтээлинэн, мүһэнэн наҕараадаланна.

65 киилэ ыйааһыҥҥа тоҕус уол киирсибититтэн, кыайыылаах аатын   Константин Егоров ылла. Киниэхэ кыһыл көмүс мэтээли, 30 тыһ.солк. сэртипикээти туттардылар.

Ветераннарга: 75 кг үөһээ ыйааһыҥҥа Федор Федоров бастаан, 50 тыһ. солк. бириэмийэлэннэ.