Хабаровскай госпиталыгар эмтэнээччилэри Эдьигээн аһылыгынан күндүлээтилэр

Бүгүн, от ыйын 6 күнүгэр,  Хабаровскай куоракка «Мит эвенкил-2024» диэн эбэҥки култууратын Уһук Илиҥҥи  эрэгийиэннэр икки ардыларынааҕы бэстибээл ыытыллар.

Бэстибээлгэ Эдьигээн улууһуттан «Һохто» этнофольклор ансаамбылыттан уонна «Хотугу дьүкээбил» оҕо образцовай ансаамбылыттан бөлөхтөр кытталлар.

Ансаамбыллар салайааччылара, СӨ Үөрэҕириитин туйгуна Евдокия Алексеева иһитиннэрбитинэн, кинилэр кэлээт да тута Хабаровскай куорат байыаннай госпиталыгар сылдьыбыттар. Ансаамбыллар кыттааччылара байыаннай дьайыыга бааһырыы кэнниттэн эмтэнэ сытар саллааттарга кэнсиэр көрдөрбүттэр уонна саллааттары кытары  тус  көрсүбүттэр.

-Ыччаттарбытын төрөөбүт дойдуларыттан аҕалбыт аһылыкпытынан: алаадьынан, бэрэскинэн,  ыһаарыламмыт собонон уонна юкола хаппыт балыгынан күндүлээтибит. Ону таһынан Эдьигээн оскуолатын үөрэнээччилэрэ суруйбут суруктарын туттардыбыт, -– диэн Евдокия Спиридоновна иһитиннэрдэ.