Хабаровскай кыраай табаларын Саха сиригэр аҕаллылар

Хабаровскай кыраай Нелькан сэлиэнньэтиттэн Алдан оройуонугар сүүрбэччэ табаны аҕаллылар. Манан Саха сиригэр табаны иитиигэ инновационнай бырайыак саҕаланар.

Раиса Ильинова диэн удьуор табаһыттар сиэннэринэн буолар. Кини эһэтин дьарыгын утумнуурга уонна табаһыт идэтин тарҕатарга саҥа бырайыагы олоххо киллэрэн эрэр. Кини бырайыагар анаан Хабаровскай кыраай Аяно-Майскай оройуонун Нелькан сэлиэнньэтин олохтоохторо Карамзиннар 25 устуука табаны бэлэхтээтилэр.

Табалары Саха сиригэр аҕаларга аҕыйаҕа суох харчы наада этэ. Бырайыагы эрэгийиэннээҕи «Биир Ньыгыл Арассыыйа» баартыйа өйөөтө, онон табалар Саха сирин буллулар.