Хабаровскайга доруобуйаларынан хааччахтаах дьоҥҥо успуорт бэстибээлэ саҕаланна

Дьокуускайга «Азия оҕолоро» норуоттар икки ардыларынааҕы VIII  оонньуулар үөрүүлээхтик аһыллар кэмигэр доруобуйаларынан хааччахтаах дьон ортолоругар Хабаровскай куоракка «ИнваАмур-2024» физкултуура-успуорт бэстибээлэ саҕаланна.

Эрэгийиэннэр икки ардыларынааҕы Уһук Илиҥҥи бэстибээл Хабаровскай кыраай Социальнай көмүскэлгэ министиэристибэтин Инбэлииттэр Бүтүн Арассыыйатааҕы уопсастыбаларын (Хабаровскай) көҕүлээһининэн аан бастаан ыытыллар.

Күрэхтэһиилэргэ Амур, Еврейскэй автономнай, Магадан, Сахалин уобаластарыттан, Приморье, Хабаровскай кыраайтартан уонна Саха Өрөспүүбүлүкэтиттэн 50-тэн тахса доруобуйатынан хааччахтаах спортсмен кыттар.

Саха сиринээҕи инбэлииттэр уопсастыбаларын (салайааччы Ирина Лебедева) сүүмэрдэммит хамаандата сүүрүү, пауэрлифтинг, дартс, оҕунан ытыы уонна муостаҕа керлинг курдук успуорт көрүҥнэригэр кыттыахтара. Ону таһынан Саха сирин спортсмена, олорон эрэ волейболга РФ сүүмэрдэммит хамаандатын чилиэнэ Станислав Никитин бэстибээл кыттыылаахтарыгар олорон эрэ волейболга маастар-кылааһы ыытта.