Хабаров уулуссата быстах кэмҥэ сабыллыаҕа

Хапытаалынай өрөмүөн ыытылларынан, от ыйын 18 күнүгэр 23:00 чаастан от ыйын 20 күнүгэр диэри Дьокуускайга Хабаров уулуссата толору сабыллар.

Хабаров уулуссатыгар Чиряев уулуссатыттан Ленин проспегар диэри учаастак массыына, оптуобус сырыытыгар сабыллар.

Онон бу күннэргэ 35-с, 17-с, 7-с оптуобустар муршруттара уларыйар. 35-с оптуобус Чиряев уулуссатыгар тута туораан, Орджоникидзе болуоссатынан, салгыы проспегынан эргийэ барар, онтон Ярославскай уулуссатынан маршрутугар киирэр (Чернышевскай уулуссатыгар).

17-с опутуобус Суорун Омоллоон уулуссатынан кэлэн, тута Хабаров уулуссатыгар туоруур, онтон Ярославскай уулуссатынан барар.

7-с оптуобус 202-с түөлбэттэн кэлэн иһэн, Чиряев уулуссатынан туоруур уонна Орджоникидзе болуоссатынан, проспегынан барар.

3-с оптуобус бэйэтин маршрутунан айанныыр.

Массыыналар эмиэ маннык эргийэн бараллара ирдэнэр.

Хабаров уулуссатын муус устар ыйтан оҥороллор, хаһаллар, билиҥҥитэ аспаалынан бүрүйэллэрэ ыраах быһыылаах. Ууну ыытыы, гаас ситимнэрин оҥорор буолан, бытааннар. Ярославскай уулуссатыттан Богатырев уулуссатыгар диэри үлэ 2027 сылга бүтүөхтээх. Саҥа тротуардар, күрүөлэр, лаампалар баар буолуохтара. Суол 4 балаһалаах буолара былааннанар.

Бэдэрээтчит «РИК Автодор», сакаасчыт «Главстрой» МКУ үлэлииллэр. Уулусса «Инфраструктура для жизни» национальнай бырайыак чэрчитинэн оҥоһуллар.