Хабылык уонна хаамыска чөмпүйэнээтигэр 180 спортсмен кыттар

Дьокуускайга «Модун» успуорт уораҕайыгар Сахалыы остуол оонньууларын Федерациятын төрүттээччи Андрей Донской аатынан хабылык уонна хаамыска өрөспүүбүлүкэтээҕи чөмпүйэнээтэ ыытыллар.

24 хамаандаттан 180-тан тахса кыттааччы 80 путевка иһин киирсэллэр. СӨ Бырабыыталыстыбатын Бэрэссэдээтэлин солбуйааччы Сергей Местников күрэхтэһии аһыллыытыгар сахалыы остуол оонньуулара биллэрдик сайдыбытын бэлиэтээтэ. Саха сиригэр бу оонньууларынан 7 тыһыынча кэриҥэ киһи дьарыктанар, олортон үксүлэрэ — оҕолор.

Турнир түөрт дьиссипилиинэнэн ыытыллар: хабылык, хаамыска (5 тоҥсуур), хамыска (7 тоҥсуур) уонна умсаах. Күрэхтэһиигэ эр дьон уонна дьахталлар ортолоругар «Манчаары оонньууларыгар» 16 путевка, оттон түөрт категорияҕа — 12 путевка оонньонор. Оттон уолаттар уонна кыргыттар кулун тутар ыйга 16 путевка иһин күрэхтэһиэхтэрэ.

Хабылык уонна хаамыска күрэҕин кыайыылаахтарын ааттара өрөбүлгэ, олунньу 16 күнүгэр, биллиэҕэ.

Санатан эттэххэ, сахалыы остуол оонньуулара 2017 сылтан «Манчаары оонньууларын» бырагырааматыгар киллэриллибиттэрэ.