Хаҕын олохтоохторо оскуола тутуутун күүскэ туруорустулар

СӨ Бырабыыталыстыбатын 2023  сыллааҕы үлэтин отчуотун Хаҕын нэһилиэгин олохтоохторугар билиһиннэрдэ.

Бастатан туран, бөлөх салайааччыта СӨ Экэниэмикэ миниистирин солбуйааччы И.Е.Елисеев өрөспүүбүлүкэҕэ ааспыт сылга ыытыллыбыт үлэ-хамнас, сайдыы, ситиһии туһунан сиһилии сырдатыытын нэһилиэк олохтоохторо сэргээн иһиттилэр. Ол кэнниттэн тута СӨ Үөрэх уонна наука министиэристибэтин Махтал суруга Хаҕын орто оскуолатын минньигэс астаах поварыгар Саргылаана Степановна Осиповаҕа дохсун ытыс тыаһыгар доҕуһуоллатан туттарылынна.

Кэпсэтиигэ нэһилиэк олохтоохторо оскуола тутуутун күүскэ туруорустулар. Ох курдук оҥостон, кустук курдук куоһанан кэлбиттэрэ билиннэ. Хас да киһи бу ыйытыыны хатылаата, туруоруста. Ордук улууска инники, оттон өрөспүүбүлүкэҕэ испииһэккэ 45-с сылдьар диэнтэн, долгуйдулар, санааҕа түстүлэр уонна кыаллан быһаарылла охсоругар баҕардылар.

Салгыы мелиорация, суолу-иис оҥоруу, биэлсэр-акушер пуунун тутуу, тыа хаһаайыстыбатын, өртөөһүн, сыана ыарааһынын, чуолаан сэлээркэ, бэнсиин сыанатын туһунан ыйытыыларга тохтоотулар.

Салгыы дьону биирдиилээн көрүстүлэр.

Ааптар хаартыскаларга түһэриитэ