Хаһааччыйаҕа бэргэһэ тигиитигэр күрэхтэстилэр

Хаһааччыйаҕа «Сайдыы» култуура дьиэтигэр аҕыйах ахсааннаах норуоттар бэргэһэлэрин (авун) тигиигэ уран тарбахтаах иистэнньэҥнэргэ сонун, ураты сэргэх күрэс буолан ааста.

 

Маннык ураты тэрээһин буолуон иннинэ норуот маастара, киэн туттар ытык киһибит Марина Алексеевна Куличкина иистэнньэҥнэргэ бэйэтин нэмиэтин түҥэтэн, хайдах тигэллэригэр сүбэлээн-амалаан үөрэттэ-такайда.

 

 

Күрэскэ түөрт иистэнньэҥ кытынна. Дьүүллүүр сүбэҕэ Марина Алексеевна бэйэтэ олордо. Көмөлөһөөччүлэрэ Дарья Карташова (ДЕЗ МУП диспиэччэрэ), Анжелика Григорьева (бибилэтиэкэр). Кинилэр бэргэһэ тигиитин, сиигин, ойуутун-дьарҕаатын, тас көстүүтүн көрдүлэр-иһиттилэр, сыаналаатылар.

 

Күрэскэ кыттар иистэнньэҥнэр аҕыйах хонук иһигэр тириини имитэн, сарыы оҥорон, бэргэһэлэрин тигэн, күрэскэ кэлэн кытыннылар, бар дьон көрүүтүгэр-истиитигэр, сыанабылыгар таһаардылар.

Уран тарбахтаахтарбыт ис сүрэхтэриттэн кыһамньыларын ууран тикпиттэрин көрбүт дьон сөбүлээтилэр, хайҕаатылар. Түмүккэ дьүүллүүр сүбэ быһаарыытынан күрэс кыайыылааҕынан Анастасия Барабанская (Хаһааччыйа оскуолатыгар үлэлиир)  буолла. Иккис бириистээх миэстэни уран тарбахтаах Оксана Григорьева (нэһилиэк тэрээһиннэрин көхтөөх кыттааччыта) ылла. Үһүс миэстэҕэ үлэ бэтэрээнэ Вера Протодьяконова таҕыста. Биһирэбил бириис Усуйаана оскуолатын бибилэтиэкэригэр Эльвира Михайловаҕа бэрилиннэ. Кыттааччыларга барыларыгар туоһу суруктар уонна сэмэй бэлэхтэр ытыс тыаһыгар арыалланан туттарылыннылар. Нэһилиэк дьоно-сэргэтэ ураты күрэс тэриллибититтэн астынан, үөрэн-көтөн туран, маннык күрэстэр, тэрээһиннэр тиһиктээхтик салҕаналларыгар баҕардылар.

Рея Карташова,

«Заря Яны» хаһыат саайтыттан

Хаһааччыйа, Усуйаана.

Хаартыскалар Ирина Ючюгяева түһэриилэрэ