Хаһаайкаҕа сүбэлэр

Хаһаайка аһа-үөлэ минньигэс буоларын туһугар куруук кыһамньытын уурар. Маныаха кыра да сүбэ-ама көмөлөөх, туһалаах буолара саарбахтаммат.

-Мааннай куруппаттан оҥоһуллар ас үллэркэй буоларын туһугар, куруппаны буһарыах иннинэ тымныы ууга сытыаран чаас кэриҥэ илитиллэр.

-Буспут бискибиити лиистэн кыайан араарбатаххына, лиис анныгар инчэҕэй соттору уур.

-Сибиэһэй балык хараҕа быччаҕар, хайыыта кыһыл буолар. Ууга уктахха тимирэр.

-Килиэби таас, фарфор эбэтэр лаахтаах (эмалированнай) иһиккэ уктахха, өр курсуйбат.

-Сибиэһэй сымыыты сырдыкка эбэтэр күн уотугар даҕайан туран бэрэбиэркэлиэххэ сөп. Эргэрбит сымыыт ортотугар харалаах буолар.

-Дьаабылыканы кырбастаан баран саахарга төкүнүттэххэ, хараарбат.

-Туорду уонна пирожнайы киэргэтэргэ анаммыт эриэхэни (грецкэй эриэхэ) духуопкаҕа уган ыллахха, амтана өссө тупсар.

Саха ыалын халандаарыттан

«Айар», 2023 с.