Хаһаайына суох кыыллары аһатыы иһин ыстараап олохтонуоҕа

Ил Түмэн сэттис ыҥырыылаах уон бэһис (уочараттаах) пленарнай мунньаҕар норуот дьокутааттара Саха Өрөспүүбүлүкэтин административнай кэһиилэр туһунан Кодексатыгар уларытыылары киллэрии туһунан өрөспүүбүлүкэтээҕи сокуон барылын бастакы ааҕыыга көрдүлэр. Сокуон барылын норуот дьокутааттара Афанасий Владимиров уонна Александр Атласов бэлэмнээн киллэрдилэр.

Сокуон барылынан киллэриллэр көннөрүүлэр өрөспүүбүлүкэ сиригэр-уотугар хаһаайына суох кыыллар хонтуруола суох үөскээн-ууһаан, олорон үөскэтэр кыһалҕаларын утары охсуһарга үлэ биир түһүмэҕинэн буолар. Ол курдук, Саха Өрөспүүбүлүкэтин административнай кэһиилэр туһунан Кодексатыгар «Хаһаайына суох кыыллары аһатыыга бобуулары кэһии» диэн 5.5-с саҥа ыстатыйа үлэҕэ киирэр.

Ол сэрэтиинэн маннык кээмэйдээх ыстарааптар олохтоноллор:

• гражданнарга — биир тыһыынчаттан үс тыһыынча солкуобайга диэри;
• дуоһунастаах дьоҥҥо — биэс тыһыынчаттан уон тыһыынча солкуобайга диэри;
• юридическай сирэйдэргэ — уон тыһыынчаттан отут тыһыынча солкуобайга диэри.

Бу кэһиини хос оҥоруу иһин маннык ыстарааптар көрүллэллэр:

• гражданнарга — үс тыһыынчаттан биэс тыһыынча солкуобайга диэри;
• дуоһунастаах дьоҥҥо — отут тыһыынчаттан биэс уон тыһыынча солкуобайга диэри;
• юридическай сирэйдэргэ — биэс уон тыһыынчаттан сүүс тыһыынча солкуобайга диэри.

Административнай эппиэтинэс маннык дьайыыларга олохтонор:

• Хаһаайына суох ыттары уопсастыбаннай сирдэргэ аһатыы иһин;
• Бултуур биригээдэлэр үлэлэригэр мэһэйдээһин иһин;
• Дьон бас билиитигэр баар ыттары булгуччулаахтык регистрациялыыртан куотунуу иһин.

«Бу өрөспүүбүлүкэ олохтоохторун олохтору-дьаһахтарын уонна доруобуйаларын көмүскүүргэ уһун кэмнээх үлэ түмүгэ», — диэн Афанасий Владимиров бэлиэтээтэ. Сокуон бырайыага бастакы ааҕыыга ылылынна.