Хаххалыыр сиэккэттэн саҕалаан сэлээппэҕэ тиийэ

Хас биирдии нэһилиэккэ Култуура дьиэтэ дьону тардар, түмэр киининэн буолар.

Уус Алдан улууһун Тулуна сэлиэнньэтин “Сайдыы” сынньалаҥ киинэ биир оннук түмэр киининэн буолар.

“Биһиги кулууппут иһинэн “Сатабыллаах хаһаайка” диэн илиилэринэн тутан-хабан оҥорор иистэнньэҥнэр түмсүүлэрэ баар, — диэн кэпсиир сынньалаҥ киинин исписэлииһэ Нюргуяна Куприянова. — Иискэ, баайыыга, ас астааһыныга, сиэлинэн хатыыга – быһата ким тугу сатаабытынан, туохха үөрэммитинэн бэйэ-бэйэбитигэр маастар-кылаастары ыытабыт. Онон ким эрэ ханна эрэ баран үөрэннэ да, хайаан да кэлэн үллэстэрэ үтүө үгэскэ кубулуйда. Ааспыт сылга түмсүүбүт үбүлүөйдээх даататын бэлиэтээбиппит, элбэх араас тэрээһиннэри оҥорбуппут, нэдиэлэни быһа маастар-кылаастар буолбуттара. Түмсүүнү уһуйаан иитээччитэ Татьяна Петровналыын иккиэн салайабыт”.

2022 сыллаахха байыаннай дьайыы саҕаланаатын кытта түмсүү чилиэннэрэ харысхаллары оҥорон, харчы хомуйан уолаттарга гигиеническай малларыгар тиийэ наадалаах малларын ылан ыыппыттар.

Аан бастаан оҥорбут хаххалыыр сиэккэлэрэ 6х3 иэннээх этэ. Нэһилиэк дьахтара барыта кыттыбыт, эбиэттэн киэһэ оскуола оҕолоро кэлэн баайаллара. Сиэккэлэрэ улахана бэрт буолан, Арчы дьиэтин сабардаан кэбиспит. Дьэ, мантан ыла хамаанда сүрүн “костяга” баар буолбут.

Былырыын улууска байыаннай дьайыы уолаттарыгар анаан таҥас тигиитигэр күрэхтэһии ыытыллыбыт. Онно тулуналар кыттаннар, иккис миэстэ буолбуттар. Бириискэ бэриллибит харчынан иистэнэр тэрил атыыласпыттар, ону таһынан олохтоох дьаһалта оверлоктаах иистэнэр массыынаны ылан биэрбит.

“Ааспыт сылга култуура иһинэн бырайыак көмүскээһинигэр кыттаммын, 60 тыһ. солк. грант ылбытым, — диэн салгыы кэпсиир Нюргуяна Иннокентьевна. – Онно үлэбитигэр наадалаах паардаах өтүүгү, лаампалары ылыммыппыт. Билигин хаххалыыр сиэккэни өрөртөн саҕалаан, ис таҥаска тиийэ тигэбит. Биһигини улуустааҕы психологическай киин көрөн-истэн салайар, холобур, кинилэр маннык таҥаһы тигэргэ бачча барар диэн миэтирэтигэр тиийэ матырыйаалынан хааччыйаллар. Сороҕор таҥаһы бэйэбит атыылаһабыт, сороҕор бэйэлэрэ биэрэллэр, үксүн кинилэртэн ылабыт. Мария Николаевна Сергеева, Розанна Михайловна уонна саамай иистэнньэҥ кыыспыт Виктория Фридриховна кулуупка кэлэн иистэнэллэр. Холобур, бу төһө тахсарынан хаххалыыр сэлээппэни тигээриҥ диэн матырыйаал биэрбиттэрэ. Билиҥҥитэ биэһи бүтэрдибит, быатыттан иҥнэн олоробут. Арааһа, уонча сэлээппэ тахсара буолуо. Итинник матырыйаал биэрэллэр, төһө кээнчэ тахсарынан тигиҥ диэн. Сороҕор нэдиэлэни быһа тигэбит, сороҕор күнүнэн бүтэрэбит. Үксүбүт үлэлиир буолан, ким төһө иллэҥнээҕинэн иистэнэбит, биир күн ааһан иһэн ньэмиэтин быһан ааһабыт, сарсыныгар киирэн тигэбит”.

Тулуна түмсүүтэ куоракка баар “Якутия с тобой” волонтерскай киини кытта сүрүннээн үлэлииллэр,  тикпит итии-сылаас таҥастарын, көмө харчы хомуйбуттарын кинилэргэ туттараллар. Маны таһынан Нюргуяна Иннокентьевна “Илии сылааһа” иис сыаҕа тэрийэн ыытар күрэхтэһиитигэр иккитэ сылдьыбыт.

“2023 сыллаахха көмөлтө аахсыйа ыһыаҕа Тааттаҕа буолбута, онно Уус Алдан хамаандатын иһигэр киирэн барса сылдьыбытым. Былырыыҥҥы күрэхтэһии куоракка буолбута, онно Викториялыын иккиэн сылдьыбыппыт. Киһи итинник тэрээһиннэргэ элбэххэ үөрэнэр, уопут атастаһаҕын, — диэн түмүктээтэ.