Хайа үлэһитэ «Идэтинэн бастыҥ» куонкуруска кыайыытын иһин 1 мөл. солк. ылыаҕа

«Интернациональнай» рудниктан хайа үлэһитэ Александр Тин-Шан «Идэтинэн бастыҥ» Бүтүн Арассыыйатааҕы куонкуруска «Иккис старт» номинацияҕа кыайда. Куонкурус федеральнай түһүмэҕин кыайыылаахтарын наҕараадалааһын тэрээһинэ Москваҕа ыытыллыаҕа.

Александр Тин-Шан эдэр исписэлиистэн дойду бастыҥ проходчига буоларыгар баара-суоҕа икки сыл үлэлээбит. Кини карьератыгар маннык тосту уларыйыы – сыалга-сорукка дьулуур чаҕылхай холобура. 2023 сыллаахха саҥаттан үөрэнэн, кини саҥа тиэхиньикэни баһылыырга, үлэ бырассыастарын тупсарыыга  уонна үлэ күрэхтэһиилэригэр көхтөөхтүк кыттар буолбут. Номнуо быйыл кини «АЛРОСА – Идэтинэн бастыҥ» корпоративнай чөмпүйэнээккэ кыайбыта, онтон федеральнай таһымҥа үрдүк кылааһын бигэргэппитэ.

«Идэтинэн бастыҥ» идэҕэ маастарыстыба Бүтүн Арассыыйатааҕы куонкуруһа 2012 сылтан ыытыллар. Быйыл РФ Бэрэсидьиэнин сорудаҕынан куонкурус киэҥ далааһыннаахтык саҥардыллан, «Кадры» национальнай бырайыак сүрүн тэрээһинэн буолар.

Александр кыайбыт «Иккис старт» номинацията үлэһит идэтигэр саҥаттан үөрэммит уонна саҥа идэлэригэр ситиһиилээхтик үлэлии сылдьар кыттааччылары түмтэ. Бу номинацияҕа 1 мөл. солкуобайдаах сүрүн бириис иһин Арассыыйа араас эрэгийиэннэриттэн кыттааччылар күрэхтэстилэр. Иккис миэстэҕэ Самара уобалаһыттан Алексей Шикида, үһүскэ – Татарстантан Станислав Нижегородцев таҕыстылар.

2025 сылга номинация ахсаана биэстэн сүүрбэҕэ диэри үрдээбит,  оттон куонкуруска  79 эрэгийиэн кыттыбыт (2024 сылга – 45). Бастыҥ аат иһин тыһыынчаттан тахса хампаанньа бэрэстэбиитэллэрэ кииристилэр. РФ 73 субъектарыгар 200-тэн тахса эрэгийиэннээҕи түһүмэх ыытылынна. 70-тан тахса салаа уонна корпоративнай чөмпүйэнээттэр кыайыылаахтара кытыннылар.