Хайыһардар дайдылар (видео)

Бу күннэргэ өрөспүүбүлүкэҕэ хамаанданан уонна биирдиилээн бастыыр иһин хайыһарга илин-кэлин түһүстүлэр. Күрэхтэһии Арассыыйаҕа Дьиэ кэргэн, Саха сиригэр Оҕо саас сылыгар ананна.

Күрэхтэһиигэ 12 улуус чулуу хайыһардьыттара кэлэн күрэхтэстилэр. Манна сааһыттан тутулуга суох, хайыһары таптааччылар бары кытыннылар. Ол курдук, 66 саастаах Бээдиттэн төрүттээх билигин Дьокуускайга олорор өрөспүүбүлүкэҕэ биллэр бэтэрээн хайыһардьыт Иннокентий Захарович Бочкарев кыттыыны ылла. Быһааран эттэххэ, кини бииргэ төрөөбүт быраата Андрей Захарович Бочкарев өрөспүүбүлүкэҕэ эмиэ биллэр бэтэрээн спортсмен. Таарыйа аҕыйах тылынан эттэххэ, Бочкаревтар бииргэ төрөөбүттэр уон биирдэр. Ол иһигэр сэттэ уол. Нэһилиэк убаастанар ыала.

Күрэхтэһии Дьокуускайга үс күн буолла. Хамаанданан уонна биирдиилээн бастыыр иһин күрэхтэһиигэ  эстэпиэтэҕэ 5 км Уус Алдан хайыһардьыттара үһүс миэстэҕэ тахсаннар кубогынан наҕараадаланнылар.

Иннокентий Захарович үһүс миэстэҕэ тиксэн, мэтээл кэттэ, диплом тутта.

Түмүккэ эттэххэ, ханна да сырыттарбыт биһиги кыракый Бээдиттэн төрүттээхпитин умнубаппыт. Дойдубут аатын ааттата сылдьарга дьулуһабыт.

Иван Сивцев — Бээди.

Хаартыскаларга Иннокентий Бочкарев түһэриитэ. Видео И.Бочкарев тиксэриитэ.