Халаан кэмигэр 293 быстах олорор пууну тэрийиэхтэрэ

Саха сиригэр халаан кэмигэр уопсайа 28 тыһыынча киһиэхэ анаммыт 293 быстах олорор пууну арыйыахтара. Бу туһунан  Ыксаллаах быһыы-майгы министиэристибэтин эрэгиийэннээҕи салаатын салайааччы Павел Гарин иһитиннэрдэ.

— Ыксаллаах балаһыанньаны нэһилиэнньэҕэ биллэрэргэ  суһал иһитиннэрии кэлим систиэмэтэ, сонуну киэҥник тарҕатар сириэстибэлэр, смс-биллэрии уонна чааһынай дьиэлэри кэрийии туһаныллар. Нэһилиэнньэттэн элбэх тутулуктаах. Информацияны кэтээн көрүөххэ уонна тута хамсаныахха наада. Эвакуацияны хойутатымаҥ, уу дьиэҕэ тиийэрин кэтэһимэҥ, эппиэтинэстээх буолуохха наада, —  диэтэ Павел Гарин.

Саха сиригэр көмүөл барыытын 204 гидрологическай постан кэтээн көрүөхтэрэ, дроннары туһаныахтара. Маныаха бүөлэммит сирдэри суох оҥорорго уонна нэһилиэнньэҕэ суһал эвакуацияны ыытыыга 18 сөмөлүөтү туһаныы былааннанар.

Быйыл өрүстэр хас да күн эрдэлээн эстиэхтэрэ, уу элбэх буолара күүтүллэр, онон эрдэттэн бэлэмнэнэн, былырыыҥҥы устубут кэмин кэтэспэккэ, сэрэхтээх олоруохха наада.