Халаан уута ааһар кэмигэр Өлүөнэ күргэтин тутуута салҕаныа

Өлүөнэ күргэтин тутуу былаһааккатыгар ыам ыйын бастакы дэкээдэтигэр муус эстэр кэмигэр үлэ салҕаныа.

Быйыл 300-тэн тахса сыбаайа буорун хаһыыта, бетоннааһын ыытыллыахтаах. Ону сэргэ пролеттары туруорар сэттэ тирэх сыбаайатын түһэрии саҕаланыаҕа. «Российская газета» интервьюга үлэ хаамыытын туһунан Ил Дархан Айсен Николаев кэпсээтэ.

«Билигин Өлүөнэ өрүс икки кытылыгар үлэ барар. Үлэ кыһын -40С кыраадыс тымныыга тохтооботоҕо. Кыһын устата кэлэр сылга арматурнай каркаһын толору оҥорууга кэмпилиэгэ оҥоһуллубута. 2024 сыл алтынньы ыйыттан күн бүгүнүгэр диэри 76 сыбаайа оҥоһуллубут. 26 тирэҕэр барыта 920 сыбаайа бетоннааһына ыытыллыа. Өрүс хас биирдии кытылынан анал бетоннай собуоттар үлэлииллэр», — диэн Айсен Николаев кэпсээтэ.

Эрэгийиэн баһылыга Өлүөнэ өрүс кытылыгар киин тирэх сыбаайаларын оҥорорго дойдуга аан бастаан сүрүн коффердам конструкцията туһанылларын санатта.

«Бу 17 миэтэрэ үрдүктээх уонна 40 миэтэрэ диаметрдаах емкость. Емкоһы өрүс түгэҕэр түһэрэллэр, оччоҕо хаһыы үлэлэрин ыытар кыахтанар. Үс коффердамҥа аналлаах тимир конструкцията барыта оҥоһуллан, тутуу былаһааккатыгар тиэрдилиннэ. Лена хаҥас кытылыгар турар технологическай былаһааккаҕа тимир конструкциялары оҥоруу саҕаланна», — диэтэ Айсен Николаев. Өлүөнэ күргэтин тутуу былаһааккатыгар инфраструктуратын көмүскүүр тэрээһиннэр ыытыллаллар. Халаан уутугар барар зонаттан тиэхиньикэни таһаараллар, технологическай былаһааккалары куталлар.

«Хаҥас кытылга 2 №-дээх технологическай былаһааккаҕа сир оҥоһуута түмүктэннэ», — диэн Айсен Николаев иһитиннэрдэ.