Халаан уутун кэтээн көрөр бөлөх үлэтэ саҕаланна

Ил Дархан Айсен Николаев Дьокуускайга Каландаришвили уулуссатыгар кэтээн көрөр саҥа сүрүннүүр кииҥҥэ сырытта. Кини бу бөлөх үлэтин-хамнаһын билистэ.

Бөлөх сүрүн соруга — федеральнай, эрэгийиэннээҕи уонна муниципальнай структуралар икки ардыларыгар бииргэ суһаллык үлэлээһини тэрийии. Бу айылҕаҕа, уо.д.а. араас ханнык баҕарар улахан быһылааннарга түргэнник хардарарга, быһаарыы ыла охсорго аналлаах.

112 эбэтэр эрэгийиэни салайар кииҥҥэ ыксаллаах быһыы-майгы туһунан иһитиннэрии киирдэҕинэ, иһитиннэрии тута сүрүннүүр кииҥҥэ ыытыллар. Онно сыһыарыллыбыт дьуһуурунай исписэлиистэр быһаарыыны ыла охсоллор, суһаллык тустаах биэдэмистибэлэргэ ыыталлар. Маннык ньыма үлэни түргэтэтэргэ уонна ылыллар дьаһаллар көдьүүстэрин үрдэтэргэ кыаҕы биэрэр.

Айсен Николаев нэһилиэнньэҕэ куттала суох буолуутун хааччыйыыга уонна ыксаллаах быһыыны-майгыны сэрэтиигэ Координационнай киин үлэтин үрдүктүк сыаналаата.

— Маннык үлэ ыксаллаах балаһыанньаҕа салайарга эрэллээҕин көрдөрбүтэ. Онтон салгыы сайыннарыы өссө чопчутук балаһыанньаны эрдэттэн сылыктыырга, билгэлииргэ уонна суһаллык быһаарсарга кыаҕы биэрэр, — диэн бэлиэтиир Ил Дархан.

Ураты болҕомто билигин сааскы халааҥҥа бэлэмнэниигэ ууруллар. Киин исписэлиистэрэ МЧС уонна атын быыһыыр сулууспалар ыыппыт сылыктыыр дааннайдарын сиһилии ырыталлар. Халааны утары бэлэмнэнии үлэлэр былааннаммыттар. Сүрүн хайысханан муниципалитеттары кытары сибээһи тутуу буолар.

Санаттахха, киин төһө көдьүүстээҕэ «Азия оҕолоро» норуоттар икки ардыларынааҕы спортивнай оонньууларга көрдөрүллүбүтэ. Тэрээһин былаһын тухары 700-тэн тахса ол-бу араас тахсыбыта регистрацияламмыт, олортон үксэ бытовой боппуруостарга уонна мэдиссиинэ көмөтүн оҥорууга сыһыаннаахтар.

СӨ Ил Дарханын уонна Бырабыыталыстыбатын пресс-сулууспата

Андрей Сорокин хаартыскаҕа түһэрииэ, СИА

Сиһилии: https://www.sakha.gov.ru/news/3906  манна киирэн көрүөххэ сөп.