Халаан уутуттан эмсэҕэлээбит нэһилиэнньэлээх пууннарга оттук сезона уһатыллыан сөп

«Халаан уутуттан эмсэҕэлээбит Саха сирин нэһилиэнньэлээх пууннарыгар муниципальнай тэриллиилэр быһаарыыларынан оттук сезона уһатыллыан сөп», — диэн ОДьКХ уонна энергетика министирэ Вячеслав Емельянов брифиҥҥэ иһитиннэрдэ.

Мунньах түмүгүнэн муниципальнай тэриллиилэр баһылыктара сайаапкалары хааччыйар тэрилтэлэр аадырыһыгар ыытыахтара. Саха сиригэр судаарыстыбаннай, чааһынай поставщиктар, ол иһигэр «ОДьКХ» ГУП, «Теплоэнергосервис» АУо, о.д.а. бааллар.

«Билигин халаан уутугар түбэспит нэһилиэнньэлээх пууннарга хомунаалынай өҥөлөрү оҥоруу уонна энергиянан хааччыйыы ураты хонтуруолга сылдьар. Энергиянан хааччыйыы тутаах соругунан буолар», — диэн миниистир бэлиэтээтэ. Муниципалитеттар эбии дуогабардары түһэрсиэхтээхтэр.

«Бу хапытаалынай тутуу эбийиэктэрин, бүддьүөт тэрилтэлэрин дьиэлэрин, чааһынай олорор дьиэлэри, ону сэргэ быстах кэмҥэ олорор пууннары ититиинэн хааччыйыы эмиэ улахан суолталаах», — диэн Вячеслав Емельянов эттэ.

Уу эбийиэктэригэр буруйу оҥорууну уонна быһылааны тахсыытын сэрэтэр, туоратар сыалтан, барыбыттан болҕомтолоох буолуу ирдэнэр. Уу эбийиэктэригэр куттал суох буолуута – биһиги барыбыт уопсай эппиэтинэспит. Бэйэбит уонна чугас дьоммут олохторун, доруобуйаларын харыстыыр туһугар, бары ирдэбиллэри тутуһан, сэрэхтээх буолуоҕуҥ! Этэҥҥэ сылдьыҥ!