Халаан уутуттан Намҥа өссө түөрт нэһилиэнньэлээх пуун босхолонно

Нам улууһугар өссө түөрт нэһилиэнньэлээх пуун халаан уутуттан босхолонно. 311 тиэргэн, ол иһигэр 230  олорор дьиэ.

Уу билигин да Арбыҥҥа баара бэлиэтэнэр. Ол туһунан бүгүн, ыам ыйын 23 күнүгэр, киэһээҥҥи брифиҥҥэ СӨ экологияҕа, айылҕаны туһаныыга уонна ойуур хаһаайыстыбатыгар миниистир Евгений Перфильев иһитиннэрдэ.

Евгений Перфильев халаан уутун содулугар эмсэҕэлээбит өрөспүүбүлүкэ олохтоохторуттан үбүнэн-харчынан көмөнү оҥорууга сайабылыанньалары ылыы салгыы ыытылларын бэлиэтээтэ. Ыам ыйын 23 күнүнээҕи туругунан 1925 сайабылыанньа киирбит.

Миниистир сайабылыанньалары ылыы болдьоҕо бэс ыйын 18  күнүгэр түмүктэнэрин санатта.

Брифинг кэмигэр үрдүкү салалта күүһүнэн Нам улууһугар халаан уутуттан ордук эмсэҕэлээбит нэһилиэнньэлээх пууннарга субуотунньуктар уонна аварийнай-чөлүгэр түһэрэр үлэлэр саҕаламмыттара этилиннэ. Ол курдук, бүгүн субуотунньукка 350 киһи үлэлиир.

СӨ Ил Дарханын уонна Бырабыыталыстыбатын пресс-сулууспата