Халааҥҥа уонна баһаарга бэлэмнэнии тэрээһиннээхтик барар

Муус устар 10 күнүгэр РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин Уһук Илин федеральнай уокуругун боломуочуйалаах бэрэстэбиитэлэ Юрий Трутнев Саха сиригэр оробуочай сырыытын чэрчитинэн Саха Өрөспүүбүлүкэтин Бырабыыталыстыбатын кытары Уһук Илин уокурукка сааскы халааҥҥа уонна баһаарга бэлэмнэнии боппуруостарыгар итиэннэ Дьокуускай куорат маастар-былаанын мунньахтарынан сурунаалыстары кытары көрүстэ.

РФ Бэрэсидьиэнин Уһук Илин федеральнай уокуругун боломуочуйалаах бэрэстэбиитэлэ Юрий Трутнев халаантан уу эбийиэктэригэр уонна баһаартан куттал суох буолуутун быһаарыыттан уонна былааннаах үлэттэн нэһилиэнньэ олоҕо тутулуктааҕын, бэлэмнэнии уонна ону сэрэтэр үлэлэргэ Уһук Илин  үп-харчы ааспыт сыллааҕар оруобуна  икки төгүл элбэх көрүллүбүтүн эттэ. «Сыл ахсын биир боппуруос турар, ол Айылҕа харыстабылын миниистирэ бэлиэтээбитинэн ханнык сир-уот баһаар тахсар түгэнигэр умуруорулларын, ханнык хапсыбатын кытары сибээстээх. Миниистир итини сирдэри ойуур пуондатыттан көһөрөргө эттэ. Ону үс нэдиэлэ иһигэр көрөргө көрдөстө, бириэмэ кырдьык кэтэспэт», — диэн Юрий Трутнев эттэ.

Кини быйылгы баһаар сезона ыам ыйын иккис аҥаарыттан буолуон сөбүн, былырыын федеральнай таһымҥа сөптөөх тэрээһини ыытан, дьаһалы ылынан, баһаар тахсыытын ааспыт сыллардааҕар 14 төгүл кыччаппыттаран кэпсээтэ.

«Гидромет сулууспата этэринэн, быйыл сааскы халаан эрдэлээн кэлэрэ уонна уустук буоларын бэлиэтиир. Уопсайынан, сааскы халааҥҥа уонна  баһаар сезонугар бэлэмнэнии үлэлэрэ толору оҥоһулуннулар», — диэн РФ Бэрэсидьиэнин Уһук Илин федеральнай уокуругун боломуочуйалаах бэрэстэбиитэлэ эттэ.

Оттон Ил Дархан Айсен Николаев быйыл даҕаны ааспыт сыллааҕы көрдөрүүнү тутуохтарын эттэ. Кини сааскы халааҥҥа эмсэҕэлиэн сөптөөх сирдэргэ бэлэмнэнии үлэтэ күүскэ барарын бэлиэтээтэ.

«Дойду үрдүнэн халааҥҥа бэлэмнэниигэ 20 млрд солк. үп көрүлүннэ. Ити үп нэһилиэнньэни ууттан харыстыыр туутуулары ыытарга барда. Онуоха быйылгы сааскы халааммыт уустук буолара сабаҕаланар. Кыра даҕаны үрэхтэр хааларытыттан тахсар кутталара баар. Аны хаар нуорматтан аһара элбэх түстэ. Билииҥҥитэ анал бөлөх нэһилиэнньэлээх пууннарга баар гидротехническай тутуулары, тырааныспар инфраструктураларын  бэрэбиэркэлиир. Ону таһынан Саха сирин улахан өрүстэригэр мууһу кэбирэтии, хараардыы, эрбээһин үлэлэрэ ыытыллаллар. Взрывчатканы Ыксаллаах быһыы-майгы министиэристибэтин уонна Росводресурсы тэрилтэлэрин кытары бииргэ үлэлээн, быраабыла быһыытынан аҕалыахпыт», — диэн Ил Дархан быһааран кэпсээтэ.