Халаантан эмсэҕэлээбит 700-тэн тахса киһи төлөбүрү ылла

Саха сиригэр ардах халааныттан эмсэҕэлээбит  730 киһи номнуо төлөбүрү ылла. Уопсай суумата 16 мөлүйүөн 50 тыһ. солк. буолла.

Көмө от ыйын 19 күнүттэн бастакы наадалаах баай-дуол сүппүтүнэн сибээстээн биир кэмнээх матырыйаалынай уонна үбүнэн көмөҕө сайабылыанньалары тутар «Госуслуги» биир кэлим портаалынан оҥоһуллар. Бу туһунан СӨ Бырабыыталыстыбатын Бэрэссэдээтэлин бастакы солбуйааччыта Дмитрий Садовников иһитиннэрдэ.

Үлэҕэ уонна социальнай сайдыыга министиэристибэтин дааннайынан, уопсайа 2 271 сайабылыанньа киирбит, ол иһигэр 1 657 – биир кэмнээх матырыйаалынай көмөҕө, 613 – үбүнэн-харчынан көмөҕө. Сайабылыанньалар 66%-нара көрүллүбүт: 880-гар сөбүлэһэр быһаарыы ылыллыбыт, 626-гар аккаастаммыт, 113-һэ эбии үлэҕэ ыытыллыбыт.

«Портаал үлэтин салгыыр. Биһиги бу көмөҕө наадыйар олохтоохтору кытта үлэлииллэригэр муниципальнай тэриллиилэри туһаайдыбыт. Бары сайабылыанньалар көрүллэллэрин курдук, бу үлэни атырдьах ыйын 9–10 күннэригэр түмүктүөххэ наада», — диэн Дмитрий Садовников  бэлиэтээтэ.

Ону таһынан, социальнай хантараагынан биэдэмистибэлэр икки ардыларынааҕы хамыыһыйа 13 кыаммат ыалга уонна соҕотох олорор кыаммат дьоҥҥо, ол иһигэр элбэх оҕолоох ыалларга, инбэлиит оҕолоох ыалларга, анал байыаннай дьайыы кыттыылаахтарын дьиэ кэргэттэрин чилиэннэригэр уонна биэнсийэлээхтэргэ уопсайа 443 тыһыынча солкуобай суумалаах өйөбүлү оҥорорго быһаарда.

Итини сэргэ, Дьокуускайдааҕы өрөспүүбүлүкэтээҕи килинииьэскэй балыыһа быраастарын биригээдэлэрэ олохтоох нэһилиэнньэни көрөллөр. Доруобуйа харыстабылын министиэристибэтин дааннайынан, 461 киһи көрүлүннэ, онтон 357-тэ улахан киһи, 107-тэ оҕо.

«Бүгүн биһиги ыстаап  үлэтин уларытабыт. Наада буоллаҕына суһаллык мустуохпут, салгыы былаан быһыытынан — бэнидиэнньиккэ, сэрэдэҕэ уонна бээтинсэҕэ. Оройуоннары кытта үлэ ыкса ситимнээхтик ыытыллар. Өймөкөөн улууһугар эмсэҕэлээбиттэргэ урбаанньыттар уонна олохтоохтор оҥорбут гуманитарнай көмөлөрүн иһин Уопсастыбыннай балаатаҕа, уопсастыбаннаска уонна өрөспүүбүлүкэ олохтоохторугар махталбытын тиэрдэбит. Бэҕэһээ бүтэһик таһаҕас ыытыллыбыта. Тырааныспары көмө быһыытынан «Саханефтегазсбыт» тэрилтэ  биэрдэ. Үлэбитин салгыыбыт», — диэн Дмитрий Садовников бэлиэтээтэ.

Уопсайа Өймөкөөн уонна Абый улуустарыгар 1 387 киһи олорор 382 тэлгэһэтэ ууга барбыта.  Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр