Халаантан эмсэҕэлээбит кэтэх хаһаайыстыбаларга көмө оҥоһуллуоҕа

Ил Дархан Айсен Николаев быһа эпиирин кэмигэр Өймөкөөнтөн эрийэн биир дьахтар ыйытыы биэрдэ. Кини сайыҥҥы халаантан эмсэҕэлээбит кэтэх хаһаайыстыбалары отунан хааччыйыы туһунан ыйытта.

— Бырабыыталыстыба бу боппуруоһу хонтуруолга тутар. Биллэн турар, балаһыанньа кытаанаҕын өйдүүбүт. Бөдөҥ пиэрмэр хаһаайыстыбаларыгар эрэ буолбакка, кэтэх хаһаайыстыбаларга эмиэ көмө оҥоһуллуоҕа. Улуустан сайаапка 1200-1300 туонна окко киирэн сытар. 900 туонна кэриҥэ от номнуо тиэрдиллибитэ.

Быйыл сорох улуустар окко былааннарын таһынан толорбуттара — Мэҥэ Хаҥалас, Чурапчы, Амма, Ньурба, Үөһээ Бүлүү. Онон кинилэр ордук отторун бэрсиэхтэрэ, — диэн Айсен Николаев хоруйдаата.