Халаантан эмсэҕэлээбит улуустарга тутуу биригээдэлэрин ыыттылар

Үрдүкү салалта ардах халааныттан эмсэҕэлээбит улуустарга дьиэни-уоту, суоллары уонна инфраструктураны түргэнник чөлүгэр түһэрэр соругу туруорар. Бастакы вице-премьер Дмитрий Садовников иһитиннэрбитинэн, бастакы тутуу биригээдэлэрэ номнуо ыытылыннылар.

«Уопсайа 14 улуустан уонна ХИФУ-тан 162 киһи барар. Кинилэр наадалаах үнүстүрүмүөннэринэн уонна матырыйаалларынан толору хааччылыннылар. Ону таһынан, чугастааҕы күннэргэ дьиэлэри өрөмүөннүүргэ аналлаах тутуу матырыйаалларын тиэрдии саҕаланыаҕа», – диэн Дмитрий Садовников бэйэтин  ТГ-ханаалыгар суруйда.

Бастакы дааннайдарынан, Өймөкөөн улууһугар 137 олорор дьиэ алдьаммыт, онтон 10-на олоччу урусхалламмыт. Муома улууһугар эмсэҕэлээбит олорор дьиэ ахсаана – түөрт.

«Инфраструктура күүскэ эмсэҕэлээтэ – биэлсэр пууна, сылааһынан хааччыйыы систиэмэлэрэ, суоллар уонна муосталар алдьаннылар. Тыа хаһаайыстыбата ордук улаханнык эмсэҕэлээтэ: 53 хаһаайыстыбаннай тутуу алдьанна, 7 төбө сүөһү өлбүт. Үчүгэй сонун да баар – сибээс үлэһиттэрэ алдьаммыт 4 сибээс лииньийэтиттэн 3-үн номнуо чөлүгэр түһэрдилэр», – диэн бастакы вице-премьер иһитиннэрдэ.

Бүгүҥҥү туругунан халаантан эмсэҕэлээбиттэртэн 999 сайабылыанньа киирдэ: 736-та – биир кэмнээх көмөҕө, оттон 263-э – сүппүт баайы-дуолу толуйтарыыга.

Санаттахха, СӨ Ил Дархана үбүнэн-харчынан көмө төлөбүрүн түргэтэтэргэ соруйбута.