Халаантан эмсэҕэлээбиттэр төлөбүрдэри тутан эрэллэр

Быйыл сааскы халаан содулуттан эмсэҕэлээбит дьон харчынан төлөбүрдэри тутан эрэллэр. 

Бэс ыйын 7 күнүнээҕи туругунан, халаан уутуттан  4056 киһи, 1172 эбийиэк (элбэх кыбартыыралаах дьиэлэр кыбартыыралара), 1010 чааһынай дьиэ эмсэҕэлээбитэ биллэр.

«Госуслуги» порталга ыксаллаах быһыыга-майгыттан эмсэҕэлээбиттэртэн материальнай уонна харчынан көмөнү ылыыга сайабылыанньалары тутуу салҕанар.

Билиҥҥитэ 7304 сайабылыанньа киирбит, ол иһигэр: биирдэ бэриллэр материальнай көмөҕө — 3870, харчынан көмөҕө — 3434 сайабылыанньа.

Бу балары көрөн баран, 2263 сайабылыанньаҕа көмө номнуо оҥоһулунна: биирдэ бэриллэр материальнай көмөҕө — 1254, харчынан көмөҕө — 1009 киһиэхэ. Үлэ салҕанар.

Сайабылыанньалары бэс ыйын 18 күнүгэр диэри туталлар диэн экология, айылҕаны туһаныы, ойуур хаһаайыстыбатын министиэристибэтэ иһитиннэрэр.